एजेन्सी – कप्तान जेरार्ड इरास्मसको सानदार शतकको सहयोगमा नामिबियाले आइसिसी विश्वकप क्वालिफायर प्लेअफमा पपुवा न्युगिनीलाई ३ सय ८२ रनको कीर्तिमानी लक्ष्य दिएको छ । युनाइटेड क्रिकेट ग्राउन्डमा टस हारेर पहिला ब्याटिङको निम्तो पाएको नामिबियाले निर्धारित ५० ओभरमा ८ विकेट गुमाउँदै ३ सय ८१ रन बनायो ।

नामिबियाले आफ्नो ओडिआई इतिहासमा बनाएको यो सबैभन्दा ठूलो योगफल हो । यसअघि नामिबियाले ओडिआईमा २०२० मा ओमानविरुद्ध ७ विकेट गुमाउँदै ३ सय २४ रन बनाएको थियो । उक्त कीर्तिमान तोड्दै पहिलो पटक ३ सय ५० माथि योगफल बनाएको हो ।

एसोसियट टोलीको रुपमा नामिबिया ओडिआईमा सर्वाधिक रन बनाउने टोली बनेको छ । नामिबियाले स्कटल्यान्डले २०१८ मा इंग्ल्यान्डविरुद्ध ३ सय ७१ रनको कीर्तिमान तोडेको छ । नामिबियाका कप्तान जेरार्ड इरास्मसले १ सय १३ बलमा ११ चौका र ५ छक्कासहित १ सय २५ रनको सानदार शतकीय इनिङ खेले ।

जेरार्डको यो ओडिआई करिअरको दोस्रो र उच्च प्रदर्शन हो । एक समय नामिबिया १०-२ को दयनीय अवस्थामा पुगेको थियो । आफ्नो ओडिआई करिअरको दोस्रो खेल खेलेका ओपनर निकोलस डेविनले ७९ बलमा १३ चौका र १ छक्कासहित ९० रनको एक यादगार इनिङ खेले । उनी सेमो कमियाबाट एलबीडब्लू आउट भएका थिए ।

तेस्रो विकेटका लागि जेरार्ड र डेविनले १ सय ५१ रनको शतकीय साझेदारी गरेका थिए । चौथो विकेटका लागि जेरार्ड र जान निकोल लोफ्टी इआटनले १ सय ३० रनको सानदार साझेदारी गर्दै विशाल योगफलको आधार तय गरेका थिए ।

निकोल ५९ बलमा ६ चौका र २ छक्कासहित ६१ रनमा आउट भए । विकेटकिपर जेन ग्रीन १६ बलमा ३ चौका र २ छक्कासहित ३२, पिक्की फ्रान्स १४ र रुबेन ट्रम्पलम्यान १७ रनमा आउट भए । कार्ल ब्रिकेनस्टक ८ बलमा १ चौका र २ छक्कासहित १९ रनमा अविजित रहे ।

पपुवा न्युगिनीका तीव्र गतिका बलर सेमा कमियाले १० ओभरमा ६८ रन खर्चेर ५ विकेट लिए । कबुआ मोरिआले ७ ओभरमा ६५ रन खर्चेर २ विकेट लिए । नामिबिया पहिलो खेलमा अमेरिकासँग ८० रनले पराजित भएको थियो । शीर्ष दुईमा रहँदै आगमी जुन जुलाईमा हुने विश्वकप छनोटमा पुग्न बाँकी सबै खेल जित्नुपर्ने हुन्छ ।