काठमाडौं (हाम्रो खेलकुद) – मलेसियाका युवा ब्याटर विरनदीप सिंह एसिसी प्रिमियर कपको पहिलो खेलमा नेपालविरुद्ध आउट भएका छन् । टियु क्रिकेट मैदानमा टस जितेर पहिला ब्याटिङ रोजेको मलेसियाले ३९ ओभरमा ३ विकेट गुमाउँदै १ सय ६१ रन बनाएको छ । मलेसियाका सैज अजिज २ र विजय उन्नी १२ रनमा क्रिजमा छन् ।

युवा ब्याटर विरनदीप ९४ बलमा २ चौकासहित ४६ रनमा आउट भए । उनी स्पिनर ललित राजवंशीको ३८ औं ओभरको पहिलो बलमा सोमपाल कामीबाट क्याच हुन पुगेका थिए । पछिल्लो समय नेपालमा टि२० फ्रेन्चाइज लिग खेल्दै आएका विरनदीप नेपालविरुद्ध संयमित ब्याटिङ गर्दै आउट भएका हुन् ।

विरनदीपले २०२१ मा एभरेष्ट प्रिमियर लिग चितवन टाइगर्सबाट खेलेका थिए । गतवर्ष नेपाल टि२० लिग विरनदीपले काठमाडौं नाइट्सबाट खेलेका थिए । मलेसियाका कप्तान अहमद फैज ९५ बलमा ८ चौका र १ छक्कासहित ७६ रन बनाउँदै आउट भए ।
दोस्रो विकेटका लागि अहमद फैज र विरनदीप सिंहले १ सय १६ रनको शतकीय साझेदारी गर्दै इनिङ अघि बढाएका थिए ।

स्पिनर सन्दीप लामिछानेले ३४ औं ओभरको दोस्रो बलमा विकेटकिपर आसिफ शेखबाट क्याच गराउँदै उक्त साझेदारी तोडेका थिए । मलेसियालाई ओपनर मोहम्मद आमिर र विरनदीप सिंहले ५.५ ओभरमा २२ रनको साझेदारी गरेका थिए ।

गुलशन झाको बलमा कभरमा सट खेल्ने धुनमा आमिर १७ रनमा दीपेन्द्रसिंह ऐरीबाट सहज क्याच आउट भएका थिए । उनले १८ बलमा ३ चौका प्रहार गरे ।