एजेन्सी – साउदी अरेवियाले एसिसी प्रिमियर कपमा मलेसियालाई १ सय ५४ रनको मध्यम लक्ष्य दिएको छ । माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको साउदी अरेविया ४६.२ ओभरमा १ सय ५३ रनमा अल आउट भयो ।

साउदीका विकेटकिपर हसिब गाफुरले ७८ बलमा ४ चौका र १ छक्कासहित सर्वाधिक ४० रन बनाए । अतिफ उर रहमान ३१ बलमा ३ चौकासहित १८ रनमा अविजित रहे । अन्तिम विकेटका लागि रहमान र गाफुरले ४४ रनको साझेदारी गरेका थिए ।

ओपनर अब्दुल वाहिदले ७२ बलमा २ चौकासहित ३६ रन बनाए । तीव्र गतिका बलर वाफिक इफरानले पहिलो ओभरको पाँचौं बलमै ओपनर वाकर उल हसनलाई दुईमा एलबीडब्लू आउट गरेका थिए । अर्का तीव्र गतिका बलर रिजवान हैदरले चौथो ओभरको पाँचौं बलमा इमरन आरिफलाई पाँच रनमा क्याच आउट गराए ।

रिजवानकै बलमा साद खान एक रनमा अनवार रिजवानबाट क्याच आउट भए । त्यसपछि स्पिनरले साउदीलाई धरासयी बनाएका थिए । स्पिनर अनवार रहमानको बलमा मोहम्मद हसन शेख २१ रनमा विरनदीपबाट क्याच आउट भए । विरनदीपले ३७ बलमा २ चौकासहित २१ रन बनाए ।

अब्दुल मनान अली ५ रनमा रहमानकै बलमा बोल्ड आउट भए । स्पिनर खिजार हायतले अब्दुल वाहिदलाई एलबीडब्लू आउट गरे । जैनुल अबिदीन ५ रनमा हायतकै बलमा एलबडब्लू आउट भए । अब्दुल वाहिद हायतकै बलमा बोल्ड भए ।

मलेसियाका खिजार हायतले १० ओभरमा १ मेडनसहित १३ रन खर्चेर ३ विकेट लिए । विरनदीप सिंहले १० ओभरमा १ मेडनसहित २६ रन खर्चेर १ विकेट लिए । मोहम्मद वाफिकले ४.२ ओभरमा २२ रन खर्चेर २ विकेट लिए । रिजवान हैदरले ६ ओभरमा २५ रन खर्चेर २ विकेट लिए । अनवार रहमानले ९ ओभरमा १ मेडनसहित ४० रन खर्चेर २ विकेट लिए ।