एजेन्सी – विराट कोहलीको कीर्तिमानी शतकका बाबजुद रोयल च्यान्जर्स बेंगलोर इन्डियन प्रिमियर लिग (आइपिएल) २०२३ को अन्तिम खेलमा गुजरात टाइटन्ससँग ६ विकेटले पराजित हुँदै बाहिरिएको छ । बेंगलोर बाहिरिदा मुम्बई इन्डियन्सले प्लेअफमा स्थान बनाएको छ ।

जितको लागि १ सय ९८ रनको विजयी लक्ष्य पछ्याएको गुजरातले १९.१ ओभरमा ४ विकेट गुमाउँदै पूरा गर्यो । गुजरातको जितमा शुभमन गिल ५२ बलमा ५ चौका र ८ छक्कासहित १ सय ४ रनमा नटआउट रहे । गिलको यो लगातार दोस्रो शतक हो । गिलले यसअघि सनराइजर्स हैदराबादविरुद्ध १ सय १ रनको शतकीय इनिङ खेलेका थिए ।

विजय शंकर ३५ बलमा ७ चौका र २ छक्कासहित ५३ रनमा आउट भए । ओपनर ऋद्धिमान शाह १२ रनमै आउट भएका थिए । दोस्रो विकेटका लागि विजय शंकर र गिलले ७१ बलमा १ सय २३ रनको शतकीय साझेदारी गरेका थिए ।

दासुन शनका डक र डेविड मिलर ६ रनमा आउट भए । राहुल टेवाटिया ४ रनमा नटआउट रहे । बेंगलोरका मोहम्मद शिराजले ४ ओभरमा ३२ रन खर्चेर २ विकेट लिए । जियकुमार वैश्यक र हर्षल पटेलले समान एक विकेट लिए ।

त्यसअघि टस हारेर पहिला ब्याटिङको निम्तो पाएको घरेलु टोली बेंगलोरले निर्धारित २० ओभरमा ५ विकेट गुमाउँदै १ सय ९७ रन बनायो । बेंगलोरका विराट कोहलीले ६१ बलमा १३ चौका र १ छक्कासहित सर्वाधिक १ सय १ रनमा नट आउट रहे । कोहली योसँगै आइपिएलमा सर्वाधिक ७ शतक प्रहार गर्ने ब्याटर बनेका छन् ।

उनीपछि क्रिस गेलले ६ र जस बटलरले ५ शतक प्रहार गरेका छन् । कोहलीको यो लगातार दोस्रो शतक समेत हो । तर बेंगलोर बाहिरिन पुग्यो । फाफ डु प्लेसिस १९ बलमा ५ चौकासहित २८, ग्लेन म्याक्सवेल ११ र माइकल ब्रेसवेल २६ रनमा आउट भए ।

अनुज रावत १५ बलमा १ चौका र १ छक्कासहित २३ रनमा नटआउट रहे । गुजरातका नुर अहमदले ४ ओभरमाा ३९ रन खर्चेर २ विकेट लिए । मोहम्मद शामी, यश दयाल र राशिद खानले समान एक विकेट लिए ।

गुजरात १४ खेलमा १० मा जित र ४ मा हारसहित २० अंकका साथ शीर्षस्थानमा रह्यो । चेन्नई १४ खेलमा ८ मा जित र ५ मा हारसहित १७ अंकका साथ दोस्रो स्थानमा रह्यो । लखनऊ १४ खेलमा ८ मा जित र ५ मा हारसहित १७ अंकका साथ तेस्रो स्थानमा रह्यो । मुम्बई इन्डियन्स १४ खेलमा ८ मा जित र ६ मा हारसहित १६ अंकका साथ चौथो स्थानमा रह्यो ।

मंगलबार पहिलो क्वालिफायर चेन्नई र गुजरातबीच प्रतिस्पर्धा हुनेछ । विजेता टोली फाइनलमा पुग्दा पराजित टोलीले दोस्रो क्वालिफायर खेल्नेछ । दोस्रो एलिमिनेटर खेलमा लखनऊ र मुम्बईबीच बुधबार प्रतिस्पर्धा हुनेछ । शुक्रबार दोस्रो क्वालिफायरमा एलिमिनेटर विजेता र पहिलो क्वालिफायरमा पराजित हुने टोलीबीच प्रतिस्पर्धा हुनेछ । फाइनल आइतबार हुनेछ ।