एजेन्सी – स्टिभ स्मिथ र ट्रविस हेडको सानदार शतकसँगै विशाल योगफल बनाएको अष्ट्रेलियाले बलिङमा पनि उत्कृष्ट प्रदर्शन गर्दै आइसिसी विश्व टेस्ट च्याम्पियनसिप २०२३ को फाइनलमा भारतविरुद्ध हाबी बनेको छ ।

दोस्रो दिनको खेल सकिँदा भारत पहिलो इनिङ ३८ ओभरमा १५१-५ को अवस्थामा छ । भारतका केएस भरत ५ र अजिंक्या रहाणे २९ रनमा क्रिजमा छन् । भारतका लागि यी दुई ब्याटर अन्तिम आशा हुन् । तर भारत पहिलो इनिङमा अझै ३ सय १८ रनले पछिछ ।

दोस्रो दिनको अन्तिम समयमा रविन्द्र जडेजा ५१ बलमा ७ चौका र १ छक्कासहित ४८ रनमा आउट भए । उनी स्पिनर नाथन लायनको बलमा स्टिभ स्मिथबाट क्याच आउट भए । खराब सुरुवात गरेको भारतलाई पाँचौं विकेटका लागि रहाणे र जडेजाले ७१ रनको साझेदारी गर्दै इनिङ उकासेका थिए।

कप्तान प्याट कमिन्सले रोहित शर्मालाई छैटौं ओभरको अन्तिम बलमा १५ रनमा एलबीडब्लू आउट गरे । रोहितले २६ बलमा २ चौका प्रहार गरे । स्कट बोलान्डको बलमा शुभमन गिल १३ रनमा बोल्ड आउट भए ।

भारतका सर्वाधिक भरपर्दा ब्याटर चेतेश्वर पुजारा क्यामरन ग्रीनको बलमा १४ रनमै बोल्ड आउट हुन पुगे । मिचेल स्टार्कको बलमा विराट कोहली सेकेन्ड स्लिपमा स्मिथबाट १४ रनमा क्याच आउट भएपछि भारत ७१-४ को अवस्थामा पुगेको थियो ।

त्यसअघि इंग्ल्यान्डको द ओभलमा टस हारेर पहिला ब्याटिङको निम्तो पाएको अष्ट्रेलिया दोस्रो दिन दोस्रो सेसनमा ४ सय ६९ रनमा अल आउट भयो । अष्ट्रेलियाका मध्यक्रमका ब्याटर ट्रविस हेडले १ सय ७४ बलमा २५ चौका र १ छक्कासहित सर्वाधिक १ सय ६३ रनको योगदान दिए ।

हेड मोहम्मद शिराजको बलमा लेग साइडको बलमा एज लागेर विकेटकिपर के एस भरतबाट क्याच आउट भए । स्टिभ स्मिथ २ सय ६८ बलमा १९ चौकासहित १ सय २१ रनमा आउट भए । स्मिथ शार्दुल ठाकुरको बलमा बोल्ड आउट भए ।

चौथो विकेटका लागि स्मिथ र हेडले ४ सय ८ बलमा २ सय ८५ रनको सानदार दोहोरो शतकीय साझेदारी गरेपछि अष्ट्रेलियाले विशाल योगफल तयार पारेको थियो ।

विकेटकिपर एलेक्स केरी ६९ बलमा ७ चौका र १ छक्कासहित ४८ रनमा आउट भए । उनी जडेजालाई छक्का हानेको अर्को बलमा रिभर स्वीप सट खेल्ने धुनमा एलबीडब्लू आउट भएका थिए । भारतले रिभ्यु लिँदै पेभेलिएन फर्काएको थियो । क्यामरन ग्रीन ६, मिचेल स्टार्क ९, प्याट कमिन्स र नाथन लायनले समान ९ रन बनाए ।

दोस्रो विकेटका लागि मार्नस लाबुसेन र डेविड वार्नरले ६९ रनको साझेदारी गर्दै खेलमा फर्काएका थिए । पहिलो दिन भोजन अघि डेविड वार्नर ६० बलमा ८ चौकासहित ४३ रनमा आउट हुन पुगेका थिए । वार्नर तीव्र गतिका बलर शार्दुल ठाकुरको बलमा एज लागेर विकेटकिपर भरतबाट नै समातिएका थिए ।

भोजन लगत्तै मार्नस लाबुसेन मोहम्मद शामीको बलमा २६ रनमा बोल्ड भएका थिए । भारतका मोहम्मद शिराजले सर्वाधिक चार विकेट लिए । मोहम्मद शामी र शार्दुल ठाकुरले समान दुई विकेट लिए ।