राकेश तिमल्सिना, चितवन – क्यापिटल कलेजले र काठमाडौंको हर्टल्यान्ड कलेजबीच चौथो क्याची एसएसपी कप क्रिकेट प्रतियोगिताको उपाधिका लागि प्रतिस्पर्धा हुने भएको छ ।

विशाल चोकस्थित नौं बिगाहा मैदानमा हर्टल्यान्डले साविक विजेता भरतपुरको ग्रेस वीरेन्द्रलाई १३ रनले र क्यापिटल कलेजले रामपुरको कृषि तथा वन विश्वविद्यालयलाई ६ विकेट हराउदै एकअर्कासँगको भेट पक्का गरेका थिए । टस हारेर ब्याटिङको निम्तो पाएको हर्टल्यान्डले २० ओभरमा ८ विकेट गुमाएर १ सय १२ रन बनाएको थियो । हर्टल्यान्डका लागि पदम केसीले सर्वाधिक ४९ रन बनाए । ५८ बलमा उनले १ छक्का र ४ चौका प्रहार गरे । यज्ञमान कुमालले १९ रन जोडे ।

बलिङतर्फ वीरेन्द्रका प्रदीप ऐरी, ललित राजवंशी र करन केसीले समान २ विकेट लिए । १ सय १३ रनको विजय लक्ष्य पछ्यएको वीरेन्द्र १७.१ ओभरमा सबै विकेट गुमाएर ९९ रनमात्र बनाउन सक्यो । हर्टल्यान्डका यज्ञमान र दिनेश आग्रीले समान ३ विकेट लिए । अलराउन्ड प्रदर्शन गरेका यज्ञमान म्यान अफ दी म्याच घोषित भए ।

अर्को खेलमा टस जितेर ब्याटिङ राजेको रामपुरले १९.२ ओभरमा अलआउट हुदै ६६ रनमा समेटियो । टोलीका सनम बुढाथोकीले १६ र अभिनव कुमार यादवले १२ रन बनाए । अन्य खेलाडीले दोहोरो अंकमा रन बनाउन सकेनन् । बलिङतर्फ क्यापिटलका ललित सिंह भण्डारीले ४ र दिपेन्द्र ऐरीले २ विकेट लिए । ६७ रनको झिनो लक्ष्य पछ्याएको क्यापिटल कलेजले ६ ओभरमा ४ विकेट गुमाएर जित निकालेको हो । क्यापिटलको जितमा अमर सिंह रटौलाले १६ रन बनाए । ९ बल खेलेका उनले १ छक्का र २ चौका प्रहार गरे । क्यापिटलका ललित सिंह म्यान अफ द म्याच घोषित भए ।

यसैबीच, सेमिफाइनलका दौरान नेपाली राष्ट्रिय टोलीका विकेट किपर सुवास खकुरेल र यू १९ का पूर्व खेलाडी प्रेम तामाङलाई सम्मान गरिएको थियो । चौथो क्याची शिव पौडेल स्मृति कप २०७३ को फाइनल खेल माघ ६ गते हुनेछ । १२ टोली सहभागी प्रतियोगिताको प्रतियोगितालाई क्याची एजुकेशन कन्सल्टेन्सीले मुख्य प्रायोजन गरेको छ ।