एजेन्सी – प्रतिबन्धपछि खेलमा फर्किएका अमेरिकाका तीव्र गतिका बलर अली खानले आइसिसी विश्वकप छनोटमा फेरि कारबाही हुनसक्ने सेलेब्रेसन गरेका छन् ।

जिम्बावेमा जारी विश्वकप छनोटमा दुई खेलमा प्रतिबन्धपछि अमेरिका टोलीमा फर्किएका उनले नेदरल्यान्ड्सविरुद्ध विकेट लिएपछि मुखमा टेप लगाउँदै सेलेब्रेसन गरेका हुन् ।

जितको लागि २ सय १२ रनको विजयी लक्ष्य पछ्याएको नेदरल्यान्ड्सका ओपनर विक्रम जित सिंह अली खानको चौथो ओभरको पहिलो बलमा ८ रनमा कट एड बोल्ड हुन पुगे ।

उक्त विकेटपछि उनले आफ्नो खल्तीबाट टेप निकालेर मुखमा लगाएका थिए । उनले अव आफू नबोल्ने संकेत देखाउँदै मुख टेप टालेका थिए । तर यहिँ सेलेब्रेसनको कारण उनी फेरि कारबाहीमा पर्न सक्ने सम्भावना छ । उनले खेलको समयमा टेप बोकर हिँडेको हुँदा कारबाहीमा पर्न सक्ने सम्भावना रहेको हो । उनलाई कारबाही गर्ने वा नगर्ने भने म्याच रेफ्रीले निर्धारण गर्नेछन् ।

गत अप्रिलमा आइसिसी प्लेअफ क्वालिफायरमा जर्सीविरुद्ध ७ विकेट लिनेक्रममा विपक्षी खेलाडीसँग झगडा गरेका थिए । त्यसैको कारण कारबाही स्वरुप एक डीमेरिट प्वाइन्ट पाएका थिए । २४ महिना भित्र ४ डीमेरिट प्वाइन्ट भएपछि उनलाई दुई अन्तर्राष्ट्रिय खेलमा प्रतिबन्ध लागेको थियो ।

त्यहिँ प्रतिबन्धको कारण विश्वकप छनोटमा नेपाल र वेस्ट इन्डिजविरुद्ध खेल गुमाउन पुगेका थिए । गतवर्ष उनले सामाजिक सञ्जालमा नेपाली क्रिकेट समर्थक संसारकै खराब रहेको प्रतिक्रिया समेत दिएका थिए ।

यो पनि : अली खान भन्छन् – ‘नेपाली समर्थक सबैभन्दा खराब’