काठमाडौं (हाम्रो खेलकुद) – नेपाल क्रिकेट संघ(क्यान) का अध्यक्ष चतुरबहादुर चन्दले जनरल म्यानेजर वृतान्त खनालले काम गर्न नसकेपछि राजीनामा दिन लगाएको बताएका छन् । खनालले सामाजिक सञ्जालमा चन्दले आफूलाई कार्यालयमा रक्सी खाएर अभद्र व्यवहार गरेको हुँदा राजीनामा दिएको गम्भीर आरोप लगाएका थिए ।

चन्दले यी सबै आरोप मात्रै भएको बताएका छन् । ‘बसीबसी खाइरहेका थिए । मलाई लगाएका आरोप पुष्टि गरोस् न । राजीनामा दिए भनेकै हो । राजीनामा दिएर मिडियालाई भनेपछि कसरी राख्ने ? काम नै गर्न सकेको छैनन् । त्यसैले राजीनामा दिन भनिएको हो, चन्दले भने ।

चन्दले ५० करोड ल्याउछु भनेपनि अहिले सम्म ५ लाख ल्याउन नसकेको बताए । ‘काम नै के गरेको छ र ? ५० करोड ल्याउछु भनेको मान्छेले डेढ वर्षमा अहिलेसम्म ५ लाख ल्याएको छैन । तपाई सक्नुहुन्न । त्यसैले राजीनामा दिनुस भनेको हो । एसिसी र आइसिसी पनि तपाईंको मेलले गर्दा रिसाएको छ । उसले राजीनामा दिनुको सट्टा काम गर्छु भन्नुपर्ने हो । मिडिया भनेर राजीनामा दिएपछि बोर्डमा कुरा आउँछ । बोर्डले थाहा पाएपछि, अशोकनाथ प्याकुरेलको राजीनामा स्वीकृत गरिएको हो भनेपछि सर्वसम्मत स्वीकृत भएको हो,’ चन्दले भने ।

रक्सी खाएर गाली गरेको भन्ने सरासर गलत भएको बताएका छन् । ‘यो सरासर गलत हो । एउटा मैदान दिनेक्रममा तपाईं काम गर्न सक्नु हुँदैन भने राजीनामा दिनुस् भनेको हो । यो सबै गलत र निराधार आरोप हो । सबै झुटो आरोप हो । उसले काम गर्न नसके पहिला नै आफैं राजीनामा दिन्छु भनेको थियो । मैले तिमीले भनेको गर्न सकेनौं । क्यानको प्रदर्शन शून्य भयो भनेको थिए ।’

‘राजीनामा एक हप्ता अघिनै दिएको हो । तीन चार दिन चुप लागेर बस्यो । मेरो राजीनामा कसरी स्वीकृत गर्न सक्छ भनेर भनेको थियो । मिडियामा नगएको भए अर्कै कुरा हुन सक्थ्यो । बोर्डमा उठेपछि सर्वसम्मत पारित भएको हो’, चन्दले भने ।

चन्दले उनको मासिक तलब १ लाख ५० हजार र यातयातमा तेल खर्च समेत रहेको बताए । वृतान्तले क्यानमा आउँदा बार्षिक ५० करोड ल्याउँछु भनेर आएको बताए । ‘क्यानमा आउँदा बार्षिक ५० करोड ल्याउछु भनेर आएको मान्छेले अहिले सम्म पाँच लाख पनि उठाएको छैन । त्यति मात्रै होईन आइसिसी र एसिसीसँग समन्वय गर्न सकेन । क्यानको कार्यलयमा कर्माचारी व्यवस्थापन गर्न सकेन । तपाई सक्नुहुँदैन त्यसैले छोड्दिनुस भनेको हो’, उनले भने ।

खनाललाई चन्दले नै कांग्रेसका केहि नेताको सिफारिसमा नियुक्त गरेको आरोप लाग्दै आएको छ । ‘पार्टीको दबाबमा होईन काम गर्न सक्छ भनेर ल्याएको हो । तर कार्यसम्पादन नभएपछि डिसेम्बरमा म्याद नथप्ने कुरा चलेको थियो । हटाउन भन्दा पनि राजीनामा दिन लगाउन भनेको हो । त्यो समय अर्को निर्णय नहुन सम्म थप्ने निर्णय भएको थियो’, उनले भने ।

यो पनि : ‘अध्यक्ष चन्दले रक्सी खाएर गाली गरेपछि राजीनामा दिएको हुँ’ – क्यानका पूर्व जीएम खनाल