काठमाडौं (हाम्रो खेलकुद) – श्रीलंकामा जारी एसिसी इमर्जिङ कप प्रतियोगितामा नेपाल बाहेक अन्य सबै टोलीले आफ्नो ए टोली पठाएका छन् । इमर्जिङ कपको कुनैपनि खेलले ओडिआई मान्यता पाउने छैनन् । इमर्जिङ कप प्रतियोगिता समूह ए मा नेपाल, युएई ए, भारत ए र पाकिस्तान ए छन् ।

नेपाली क्रिकेट टोली पछिल्लो ६ महिनामा आइसिसी विश्वकप लिग २, एसिसी प्रिमियर कप र विश्वकप छनोटमा व्यस्त रह्यो । नेपालको डेथ ओभर बलिङ कमजोरीको रुपमा देखिएको थियो । अर्कोतर्फ दुई युवा तीव्र गतिका बलर किशोर महतो र कमलसिंह ऐरी नेपालको १८ सदस्य टोलीमा भएपनि अन्तिम टोलीमा स्थान बनाउन संघर्ष गरे ।

किशोर महतो विश्वकप छनोटदेखि नेपालको टोलीमा छन् । नेपालले इमर्जिङ कपमा करण केसी र ज्ञानेन्द्र मल्ललाई विश्राम दिएको छ । सन्दीप लामिछाने र दीपेन्द्रसिंह ऐरी ग्लोबल टि२० क्यानडाको कारण टोलीमा छैनन् । इमर्जिङ टिम्स कपमा त्यसैले नेपालले तीव्र गतिका बलर कमलसिंह ऐरीलाई मौका दिने अनुमान गरिएको थियो । उनी आफ्नो प्रदर्शन देखाउने एउटा राम्रो अवसरको पर्खाइमा छन् ।

इमर्जिङ कपमा मौका पाउनु पर्ने पहिलो दाबेदार खेलाडीमा कमल थिए । अझ ओमान र युएईले आफ्नो पहिलो रोजाईको टोली नै पठाएका छैनन् । दोस्रो र तेस्रो रोजाईका खेलाडी पठाएका छन् । यो प्रतियोगिता आफ्नो बेन्चमा रहेका खेलाडीलाई मौका दिने सबैभन्दा राम्रो अवसर हो । हार्दा पनि कुनै फरक पर्दैन र नेपालले केहि गुमाउनु पर्ने छैन ।

२०२२ अप्रिलमा मलेसियाविरुद्ध टियु क्रिकेट मैदानमा घाइते भएका कमल ब्युटीबोनको शल्यक्रियापछि घरेलु क्रिकेटमा उत्कृष्ट प्रदर्शन गरेका थिए । गतवर्ष प्रधानमन्त्री कपको उपाधि एपिएफ क्लबलाई जिताउन कमल र किशोरको जोडीले उत्कृष्ट प्रदर्शन गरेका थिए ।

कमलले नेपाली क्रिकेट टोलीमा आफ्नो प्रभाव छाडिसकेका छन् । २०२२ मा ओमानमा भएको आइसिसी विश्वकप टि२० छनोटमा कमलले नेपालको टोलीबाट सानदार प्रदर्शन गरेका थिए । सोमपाल कामी र करण केसी दुबै विश्वकप छनोट टोलीमा नहुँदा उनी पहिलो रोजाईको तीव्र गतिको बलरको रुपमा खेलेका थिए । प्रदर्शन पनि उत्कृष्ट थियो ।

तर मलेसियासँगको घाइते भएपछि पनि उनले मौका पाउन सकेनन् । पछिल्लो समय लगातार टोलीको प्रशिक्षणमा रहेपनि मौका नपाएका हुन् । नेपालले सोमपाल कामीलाई विश्राम दिँदै कमललाई मौका दिनुपर्ने थियो । तर पनि नेपालले सोमपाललाई नै निरन्तरता दिएपछि कमलले पुन आफ्नो प्रदर्शन देखाउन पाएनन् ।

नेपाली क्रिकेट टोलीका मुख्य छनोटकर्ता दीपेन्द्र चौधरीले लाइक टु लाइक रिप्लेसमेन्ट (एउटै भूमिका भएको प्रतिस्थापन) को कारण कमलले मौका नपाएको बताउँछन् । ‘कमललाई मौका भन्दा पनि लाइक टु लाइक रिप्लेसमेन्ट छ । कमल भनेको हामीले सोमपाल रिप्लेसमेन्टमा हेरेका हौं । टोलीमा सोमपाल छ । किशोर भने करणको रिप्लेसमेन्ट हो । त्यसैले मौका नपाएको हो’, छनोटकर्ता चौधरीले हाम्रो खेलकुदसँग भने ।

सोमपाल विश्वकप छनोटको पहिलो खेलमा जिम्बावेविरुद्ध घाइते हुन पुगेका थिए । सोमपालले विश्वकप छनोटमा खेल नखेलेको हुँदा इमर्जिङ कपमा मौका दिएको उनले बताए । ‘सोमपाल घाइते हुँदा त्यहाँ खेल नै खेलेन । हामी यसलाई एसिया कपको तयारीको रुपमा लिएका थियौं । सोमपालले पर्याप्त बलिङ गरेको भए हुन्थ्यो । त्यसले गर्दा पनि उनलाई टिममा राख्नु पर्यो’, उनले भने ।

सोमपालले नेपालको एक दशकदेखि खेल्दै आएका छन् । उनी नेपालको पहिलो रोजाईका तीव्र गतिका बलर हुन् । यसमा कुनै शंका छैन । तर एउटा प्रतियोगिता नखेल्दैमा सोमपाललाई इमर्जिङ कपमा मौका दिनुपर्छ र भन्ने प्रश्नको जवाफमा उनले सोमपाललाई खेल समय चाहिएको बताए ।

‘सोमपालको स्थानमा मौका दिन सकिन्थ्यो । तर त्यहाँ बलनै फालेको छैन । सबै प्रशिक्षकसँग मिलेर गर्ने हो । मैले एक्लै गर्ने पनि होईन । प्रशिक्षकले पनि उसले गरेको छैन, एसिया कपको तयारीको लागि पनि उता बलिङ गर्नुपर्यो ।’

‘कमललाई क्याम्पमा राखेको छ । जहिल्यै वैकल्पिकमा हुन्छ । म हरेक दिन क्याम्पमा हुँदैन । उसको हरेक दिनको सुधार मैले कोचबाट नै लिनुपर्छ । हामीले कोचसँग सल्लाह गरेर नै सोमपाललाई मौका दिएका हौं । कमलको बारे हामीले धेरै सोच्यौं, तर अन्तिममा हामी सोमपालमै गयौं’, चौधरीले भने ।

आरिफ शेखले पारिवारिक कारण इमर्जिङ कप नखेल्ने निर्णय लिए । तर नेपालले कमललाई होईन पवन सरार्फलाई मौका दियो । पछिल्लो समय युवा खेलाडीमा सर्वाधिक मौका पाउँदा पनि राम्रो गर्न नसकेर पवन गतवर्ष भदौंमा केन्या भ्रमणपछि नेपाली टोलीबाट बाहिरिएका थिए । पछिल्लो समय उनी बन्द प्रशिक्षणमा समेत छैनन् ।

लगातार फ्लप भएर बाहिरिएका पवनलाई नै मौका दिएपछि पुन प्रश्न उठेको छ । पवन केहि क्यान पदाधिकारी र कर्माचारीसँग राम्रो सम्बन्ध हुँदा खराब प्रदर्शनका बाबजुद लगातार मौका पाउने आरोप समेत लाग्ने गर्दछ । गतवर्ष भदौंमा नेपालले कुशल भुर्तेललाई टोलीबाट बाहिरि गरेर केन्या भ्रमणमा पवनलाई ओपनिङमा खेलाउने प्रयास समेत गरेको थियो । त्यहाँपनि उनी फ्लप भएपछि टोलीबाट बाहिरिनु परेको थियो ।

इमर्जिङ कपमा सोमपाल, प्रतिश जि.सी, किशोर महतो र गुलशन झा तीव्र गतिका बलरको रुपमा छन् । ५ तीव्र गतिका बलर पठाउन टोलीमा उपयुक्त नहुने छनोटकर्ता दीपेन्द्र चौधरीको जवाफ छ ।

‘चार जना तीव्र गतिका बलर टोलीमा छन् । अफ स्पिनर थिएन । त्यसैले पठाएको हो । पवन हाम्रो सेटअपमै थियो । क्यानले हामीलाई २८/३० जना दिदैन । खर्चको हिसाबले होला । पवन जहिल्यै हाम्रो ३० जनाको सेटअपमा थियो । पवन भारतमा अभ्यास गर्न गएको थियो । त्यहाँबाट पनि सुधारको राम्रो कुरा आएको थियो । उ आउने बितिक्कै उसले निधि कपमा राम्रो प्रदर्शन गर्यो । दीपेन्द्र नभएसँगै हामी सन्दीप जोरासँग गयौं । आरिफ नभएपछि पवनलाई ल्याउने राम्रो विकल्प भयो’, उनले भने ।

पवनको प्रदर्शन मात्रै होईन उनको टोलीमा भूमिका अहिलेसम्म स्पष्ट छैन । कहिले ओपनिङ त कहिले मध्यक्रममा खेल्ने गर्दछन् । पहिलो खेलमा पाकिस्तानविरुद्ध मध्यक्रममा खेल्दा उनी लयमा देखिएनन् । १० महिनापछि टोलीमा फर्किएका उनी एक रनमै आउट भए । बलिङमा दुई विकेट लिएका थिए ।

‘पवन लाइक टु लाइक रिप्लेसमेन्ट एक हिसाबले दीपेन्द्रको हो । यी दुबैले अफ स्पिन फाल्छन् । दिप्पीले पनि ब्याटिङ गर्छ । उसले पनि ब्याटिङ गर्छ । दिप्पीले प्रदर्शन गरोस् वा नगरोस् उ हाम्रो टप फाइभ खेलाडी हो । उसले कतै न कतैबाट टोलीलाई योगदान दिएको हुन्छ’, उनले भने ।

पवनलाई नेपालले धेरै मौका दिएको छ । तर उनले कहिल्यै आफूलाई प्रमाणित गर्न सकेका छैनन् । फेरि उनलाई मौका किन भन्ने प्रश्नम उनले अफस्पिनरमा अन्य खेलाडी नभएको बताउँछन् ।

‘कसैलाई निकाल्न भन्दा पहिला त्यसको रिप्लेमेन्ट त खोज्नु पर्यो नि । पवन छैन भने हामीसँग अफस्पिनर को त ? शेर मल्ल र यू१९ सुवास भण्डारी छन् । शेर मल्ललाई पनि हामीले हेरि राखेका छौं । प्रधानमन्त्री कपमै विकेट लिनुपर्छ भन्ने छैन । पिएम कपको प्रदर्शनले ओडिआईमा सफल हुन्छ भन्ने कुनै ग्यारेन्टी छैन’, उनले भने ।

यो पनि : भारतको दादागिरीले नेपाललाई दुःख!