काठमाडौं (हाम्रो खेलकुद) – लेग स्पिनर कुशल भुर्तेलको एसिसी इमर्जिङ टिम्स एसिया कपमा युएई ए विरुद्ध पाँच विकेट पूरा गरेका छन् । टस जितेर पहिला ब्याटिङ रोजेको युएई ३३.३ ओभरमा ७ विकेट गुमाउँदै १ सय ३१ रन बनाएको छ ।

कुशल भुर्तेलले अश्रन्त वल्थापालाई १६ रनमा विकेटकिपर अर्जुन साउदबाट स्टम्पिङ गर्दै आफ्नो पाँच विकेट पूरा गरेका हुन् । कुशल भुर्तेलले अन्तर्राष्ट्रिय क्रिकेट करिअरमा पहिलो पटक पाँच विकेट पूरा गरेका हुन् । कुशलले ७ ओभरमा ३१ रन खर्चेर ५ विकेट लिएका छन् ।

युएईलाई ओपनर अर्यांश शर्मा र लवप्रीत सिंहले पहिलो विकेटका लागि १०.४ ओभरमा ३९ रनको साझेदारी गरेका थिए । स्पिनर कुशल मल्लको बलमा अर्यांश शर्मा १४ रनमा पवन सरार्फबाट क्याच आउट भए । पवन सराफले अंश टन्डनलाई ३ रनमा एलबीडब्लू आउट गरे । लवप्रीत र एथान डि सोल्झाले ४४ रनको साझेदारी गरेका थिए ।

लेग स्पिनर कुशल भुर्तेलको बलमा स्वीप खेल्ने धुनमा सोल्झा १८ रनमा एलबीडब्लू आउट भए । उनले २५ बलमा २ चौका र १ छक्का प्रहार गरे ।

युएईका ओपनर लवप्रीत सिंह ८२ बलमा ६ चौका र १ छक्कासहित ५२ रनमा क्याच आउट भए । लेगस्पिनर कुशल भुर्तेलको बलमा उनी डीप मिडविकेटबाट सन्दीप जोराबाट क्याच आउट भए ।

कुशल भुर्तेलको फवाद नवाज ४ रनमा विकेटकिपर स्टम्पिङ आउट भए । विकेटकिपर अर्जुन साउदले उत्कृष्ट स्टम्पिङ आउट गर्दै पेभेलिएन फर्काएका थिए ।

कुशल भुर्तेलकै बलमा कप्तान तथा प्रमुख ब्याटर अली नासिर एक रनमा कट एण्ड बोल्ड आउट भएपछि युएई संकटमा पुगेको छ ।