काठमाडौं (हाम्रो खेलकुद) – नेपालका ओपनर कुशल भुर्तेलले एसिसी इमर्जिङ एसिया कपमा युएई ए विरुद्ध अविश्वसनीय बलिङ प्रदर्शन गरे । युएई ए लाई १ सय ५७ रनमा अल आउट गर्न कुशल भुर्तेलले एक्लै ६ विकेट लिए ।

एक समय २३.५ ओभरमा ९६–२ को बलियो अवस्थामा रहेको युएईको युवा टोलीलाई कुशलले आफ्नो लेग स्पिनको जादुमा फसाए । उनले १० ओभरमा ४० रन खर्चेर ६ विकेट लिए ।

समग्रमा नेपालबाट लिष्ट ए मा ६ विकेट लिने उनी सन्दीपपछि दोस्रो खेलाडी थिए । सन्दीपले आइसिसी विश्वकप लिग-२ मा अमेरिका र ओडिआई सिरिजमा पपुवा न्युगिनीविरुद्ध समान ६ विकेट लिएका थिए ।

भुर्तेलले ४३ बलमा ९ चौका र ४ छक्कासहित ७१ रनको आक्रामक इनिङ खेलेका थिए । कुशलले नेपालबाट एकै खेलमा पाँचमाथि विकेट र अर्धशतक बनाउने पहिलो खेलाडी बन्ने कीर्तिमान बनाए ।

कुशल पहिला तीव्र गतिका बलिङ अलराउन्डर थिए । त्यसैले उनले सात, आठौं वा तल्लो नम्बरमा ब्याटिङ गर्ने गर्दर्थे ।

टोलीमा उनी तीव्र गतिको अलराउन्डरको रुपमा मौका पाउथे । नेपालले २०१६ मा यू१९ विश्वकप खेल्दा कुशलले सबै खेलमा तल्लोक्रममा ब्याटिङका साथ तीव्र गतिङमा बलिङ गरेका थिए ।

तर पछि कुशलले तीव्र छाडेर लेग स्पिनर बनेका थिए । नेपाली क्रिकेट टोलीबाट भने कुशलले २०२१ मा त्रिकोणात्मक टि२० आई सिरिजमा नेदरल्यान्ड्सविरुद्ध टियुमा डेब्यू गरेका थिए ।

गतवर्ष प्रधानमन्त्री कप एकदिवसीय क्रिकेट प्रतियोगितामा कुशलले आफ्नो लेग स्पिनको जादु देखाएका थिए । कुशलले लेग स्पिन गर्दै ५ विकेट लिएका थिए । जितको लागि २ सय ७४ रनको विजयी लक्ष्य पछ्याएको मधेशलाई ८२ रनमा अल आउट गर्न कुशलले ८.३ ओभरमा २ मेडनसहित २२ रन खर्चेर ५ विकेट लिए ।

चोभार एण्डबाट बलिङमा आएका उनले मधेशका आदिल अन्सारी, रतन रौनक, राजेश यादव, रुपेश सिंह र प्रदीप पासवानलाई आफ्नो शिकार बनाएका थिए । त्यो नै कुशलले कुनैपनि खेलमा लिएको पहिलो पाँच विकेट थियो । उक्त खेलपछि कुशलले तीव्र गतिको बलिङ छाडेर लेग स्पिनर बन्नुको कारण बताएका थिए ।

‘बलिङमा करिअर छ जस्तो लागेन । मेरो बलिङमा पेश पनि थिएन । ब्याक पेनको पनि समस्या थियो । बलिङ छाडेपछि नेटमा स्पिन गर्न थाले । अरु खेल्दा म बलिङ गर्ने र म खेल्दा अरु बलिङ गर्ने गर्दा गर्दै लेग स्पिनर बने’, कुशलले पाँच विकेट लिएपछि गतवर्ष हाम्रो खेलकुदसँग भनेका थिए ।

कुशलले नेटमा त्यतिकै फ्याँल्दा लेग स्पिनर बनेको बताउँछन् । ‘त्यस्तो केहि होईन । नेटमा जसले हात घुमाउँदा पनि हुन्छ । कसैले ब्याटिङ गरेको छ भने उसलाई सहयोग गर्न फाल्थे । कहिले काँही बलर हुने थिएन । म खेल्दा अरु र अरुले खेल्दा मैले बलिङ गर्दा गर्दै लेग स्पिनर भए’, उनले भनेका थिए ।

तत्कालिन प्रशिक्षक मनोज प्रभाकरले गत नोभेम्बरमा कुशल भुर्तेललाई लेग स्पिनरको रुपमा खेलाउँदै तल्लोक्रममा ब्याटिङ गराएका थिए । युएईसँग तीन ओडिआई खेलको सिरिजमा कुशल भुर्तेलले लेग स्पिन गरेका थिए । युएईसँगको पहिलो ओडिआई खेलमा कुशलले १ ओभरमा ८ रन खर्चिएका थिए । त्यो खेलमा उनले सातौं नम्बरमा ब्याटिङ गरेका थिए ।

दोस्रो खेलमा उनले ७ ओभरमा २८ रन खर्चेर १ विकेट लिएका थिए । युएईका कप्तान सिपी रिजवानलाई रोहित पौडेलबाट क्याच गराउँदै ओडिआईमा डेब्यू विकेट लिएका थिए ।

त्यो खेलमा कुशलले पाँचौं नम्बरमा ब्याटिङ गरेका थिए । तेस्रो खेलमा कुशलले ७ ओभरमा १ मेडनसहित ३२ रन खर्चेर २ विकेट लिएका थिए । कुशलले उक्त खेलमा एलिशान शराफुलाई ३३ र अहमद राजालाई शून्यमा आउट गराएका थिए ।

त्यसपछि आइसिसी विश्वकप विश्वकप लिग-२ मा नामिबिया भ्रमणमा समेत उनलाई नेपालले लेग स्पिनरको रुपमा खेलाएको थियो । ब्याटिङ तल्लोक्रममा गरेका थिए ।

नेपालको ब्याटिङक्रम भद्रगोल बनाउँदै कुशलले तल्लोक्रममा खेलाएपछि तत्कालिन प्रशिक्षक मनोज प्रभाकरलाई क्यानले वर्खास्त गरेको थियो । प्रभाकरले आसिफ र अर्जुन साउदलाई ओपनिङ गराउँदा कुशललाई तल्लोक्रममा खेलाउने निर्णय लिएका थिए ।

कुशल भुर्तेलको पूरा क्रिकेट जीवनी पढ्नुहोस् : अवसरमा कुशलले देखाएको कौशल