एजेन्सी – ओली हरिसको कीर्तिमानी विष्फोटक शतकमा घरेलु टोली स्कटल्यान्डले आइसिसी टि२० विश्वकप युरोप क्षेत्र छनोटमा इटालीमाथि १ सय ५५ रनको फराकिलो जित हात पारेको छ । लगातार तेस्रो जितका साथ स्कटल्यान्डले २०२४ मा अमेरिका र वेस्टइन्डिजमा हुने विश्वकप सम्भावना बलियो बनाएको छ ।

टस हारेर पहिला ब्याटिङको निम्तो पाएको स्कटल्यान्डले निर्धारित २० ओभरमा २ विकेट गुमाउँदै २ सय ४५ रन बनाएको थियो । स्कटल्यान्डका ओली हरिसले ५३ बलमा १४ चौका र ८ छक्कासहित १ सय २७ रनको अविजित विष्फोटक शतकीय इनिङ खेले ।

३२ वर्षीय ओलीले ४० बलमै शतक पूरा गरेका थिए । उनी स्कटल्यान्डबाट कुनैपनि अन्तर्राष्ट्रिय खेलमा सर्वाधिक छिटो शतक हान्ने खेलाडी बनेका छन् । स्कटल्यान्डको यो २०१९ मा नेदरल्यान्ड्ससँग २ सय ५२ रनपछि दोस्रो ठूलो टि२० आई योगफल हो ।

त्यस्तै १ सय ५५ रन टि२० आईमा रनको हिसाबमा स्कटल्यान्डको सबैभन्दा ठूलो अन्तरको जित हो । यसअघि २०१८ मा नेदरल्यान्ड्सविरुद्ध १ सय १५ रनको जितको अन्तर सर्वाधिक ठूलो थियो ।

ओली हरिसले २०१९ मा जर्ज मुन्शेले नेदरल्यान्ड्सविरुद्ध खेलेको १ सय २७ रनको कीर्तिमान बराबर गरे । टि२० आईमा एकै खेलमा स्कटल्यान्डबाट मुन्शे र अली हरिस सर्वाधिक रन बनाउने खेलाडी बनेका छन् । ब्रेन्डन म्याकमुलेन ५० बलमा ९ चौका र ६ छक्कासहित ९६ रनमा अविजित रहे । जर्ज मुन्शे १२ र माइकल लिस्क ४ रन बनाए ।

जितको लागि २ सय ४६ रनको विशाल विजयी लक्ष्य पछ्याएको इटाली १२.४ ओभरमा ९० रनमा अल आउट भयो । टोलीका ग्रान्ट स्टीवर्टले २१ बलमा ४ चौका र ३ छक्कासहित सर्वाधिक ४१ रन बनाए । स्कटल्यान्डका गेभिन मेनले ३.४ ओभरमा २६ रन खर्चेर सर्वाधिक ५ विकेट लिए । ब्राड्ली करी र शफ्यान शरिफले समान दुई विकेट लिए ।

स्कटल्यान्ड ३ खेलमा ६ अंकका साथ शीर्ष स्थानमा छ । आयरल्यान्ड ३ खेलमा ६ अंक भएपनि नेटरनरेटको कारण दोस्रो स्थानमा छ । प्रतियोगितामा स्कटल्यान्ड, आयरल्यान्ड, जमर्नी, जर्सी, डेनमार्क, इटाली र अष्ट्रिया छन् । शीर्ष दुई टोली विश्वकपमा पुग्नेछन् ।