एजेन्सी – नेपाली क्रिकेट टोलीका स्पिनर सन्दीप लामिछाने सम्मिलित सर्रे जागुअर्सले ग्लोबल टि२० क्यानडामा आज ब्राम्पटन वल्भ्सविरुद्ध खेल्दैछ । खेल आज साँझ ८ : ४५ मा सुरु हुनेछ ।

सन्दीप सम्मिलित सर्रेलाई शीर्ष चारमा रहँदै प्लेअफमा पुग्न यस खेल जित्नै पर्ने दबाब छ । सर्रे ५ खेलमा २ मा जित, १ मा हार र २ खेलमा वर्षाको कारण रद्ध भएपछि ६ अंकका साथ तेस्रो स्थानमा छ ।

सर्रेले भोली साँझ मिसिसौगा प्यान्थर्ससँग खेल्न बाँकी छ । प्लेअफमा पुग्न सर्रेले कम्तिमा एक खेल जित्नुपर्ने हुन्छ । बाँकी दुबै खेल हारेको खण्डमा सर्रे समूह चरणबाटै बाहिरिनु पर्ने हुन्छ ।

आज पराजित भएमा अन्तिम खेलमा गर वा मरको अवस्था हुनेछ । सन्दीपले ४ खेलमा ७ विकेट लिएका छन् । सर्वाधिक विकेट लिने बलरमा लोगन भान बिक १३ र कार्लोस ब्रेथवेट ८ पछि सन्दीप तेस्रो नम्बरमा छन् ।

नेदरल्यान्ड्सलाई विश्वकपमा पुर्याउन सानदार प्रदर्शन गरेका तीव्र गतिका बलर बीक देखि सर्रे सचेत हुनुपर्छ । ब्राम्पटनमा न्युजिल्यान्डका मार्क च्यापम्यान, कोलिन डि ग्रान्डहोम, टिम साउथी, नेदरल्यान्ड्सका म्याक्स ओडाआउड र बीक जस्ता खेलाडी छन् ।

उता सर्रेमा बेन कटिङ, इंग्ल्यान्डका ओपनर एलेक्स हेल्स, पाकिस्तानका इफ्तिखार अहमद, बंगलादेशका लिटन दास, पाकिस्तानका मोहम्मद वासिम र मोहम्मद हरिस छन् ।

दीपेन्द्रसिंह ऐरी सम्मिलित मोन्टरियल टाइगर्स ६ खेलमा ४ मा जित र १ मा हारसहित ९ अंक जोड्दै शीर्ष स्थानमा छ । दीपेन्द्रको टोली भने एक खेल अगावै प्लेअफमा पुगेको छ । दीपेन्द्रको टोलीले टाइगर्सले आज १:१५ मा राती भ्यानकुभेर नाइट्ससँग खेल्नेछ । उक्त खेलमा विजयी भएमा शीर्ष स्थानमा रहँदै पहिलो क्वालिफायर खेल्नेछ ।

ब्राम्पटन ६ खेलमा ३ मा जित, १ मा हार र २ खेल वर्षाको कारण रद्ध हुँदा ८ अंकका साथ दोस्रो स्थानमा छ । ब्राम्पटनले पनि शीर्ष चारमा रहँदै प्लेअफ खेल्ने पक्का गरेको छ ।

सर्रे ५ खेलमा ६ अंकका साथ तेस्रो स्थानमा छ । टोरान्टो नेशनल ६ खेलमा २ मा जितसहित ५ अंकका साथ चौथो स्थानमा छ । भ्यानकुभेर नाइट्स ५ खेलमा ५ अंकका साथ पाँचौं स्थानमा छ । मिसिसौगा प्यान्थर्स ६ खेलमा ५ मा हारसहित १ अंकका साथ पुछारमा रहँदै बाहिरिएको छ ।