एजेन्सी – तीव्र गतिका बलर जस्प्रित बुमराहको कप्तानीमा भारतले पहिलो टि२० आई खेलमा आज घरेलु टोली आयरल्यान्डविरुद्ध खेल्दैछ । खेल नेपाली समय अनुसार राती ७ः ४५ मा डब्लिनमा सुरु हुनेछ । आयरल्यान्डको पल स्टर्लिङ र भारतको जस्प्रित बुमराहले कप्तानी गर्नेछन् ।

बुमराह भारतीय टोलीमा २०२२ जुलाईमा इंग्ल्यान्ड भ्रमणपछि पहिलो पटक फर्किएका छन् । ब्याक इन्जुरीको कारण लामो समय मैदान बाहिर भएका बुमराहलाई एसिया कप र विश्वकप अघि आयरल्यान्ड सिरिज निकै महत्वपूर्ण हुनेछ । भारत आयरल्यान्डको सिरिजबाट बुमराहको पूनरागमन र लय दुबै चाहन्छ ।

भारतले आयरल्यान्ड भ्रमणमा दोस्रो रोजाईको टोली पठाएको छ । यशस्वी जैसवाल र ऋतुराज गायकवाडले ओपनिङ गर्ने सम्भावना छ । यी दुबै ब्याटर भारतीय क्रिकेटका भविष्य हुन् । सन्जु स्यामसन र तिलक बर्माको लागि आयरल्यान्ड सिरिज निकै महत्वपूर्णछ ।

एसिया कप र विश्वकपमा स्थान बनाउन सन्जुलाई सामान्य प्रदर्शनले हुने छैन । वेस्टइन्डिजविरुद्ध यसै साता उनको प्रदर्शनले विश्वकपमा स्थान कठिन बनाएको छ । आइपिएलमा सानदार प्रदर्शन गरेका रिंकु सिंहले डेब्यू गर्ने सम्भावना छ । रिंकु फिनिसरको रुपमा खेल्नेछन् ।

शिबम दुबे पनि सानदार पूनरागमन चाहन्छन् । जस्प्रित बुमराह, अर्शदीप सिंह र मुकेश कुमार पहिलो रोजाईको तीव्र गतिको बलरमा खेल्ने सम्भावना छ । स्पिनरमा वासिन्टन सुन्दर र रवि विश्रोई नहुनेछ ।

आयरल्यान्ड आफ्नो घरेलु मैदानको भरपूर्ण फाइदा लिँदै भारतलाई स्तब्ध पार्न चाहन्छ । गतवर्ष भारतविरुद्ध राम्रो प्रदर्शन गरेपनि जित निकाल्न सकेको थिएन । ओपनर पल स्टर्लिङ आयरल्यान्डका प्रमुख ब्याटर हुन् । स्टर्लिङले कप्तानी गर्दैछन् ।

विश्वकप छनोटमा खराब प्रदर्शनपछि एन्डी बालबर्नीले कप्तानबाट राजीनामा दिएका थिए । स्टर्लिङ, लोर्कान टकर र ह्यारी टेक्टर आयरल्यान्डका प्रमुख ब्याटर हुन् । गतवर्ष ह्यारी टेक्टरले भारतविरुद्ध सानदार प्रदर्शन गरेका थिए ।

पछिल्लो समय राम्रो लयमा रहेका जर्ज डोकरेल र कर्टिस क्याम्फर भारतलाई निराश बनाउन सक्ने खुबी भएका खेलाडी हुन् । आइपिएलमा गुजरात टाइटन्सबाट खेलेपछि प्रमुख बलर जोश लिटिलको प्रदर्शन राम्रो छैन ।

उनलाई राम्रो प्रदर्शनको दबाब छ । क्रेग योंग, लिटिल र फिन ह्यान्ड प्रमुख तीव्र गतिका बलर हुन् । भारत र आयरल्यान्डबीच तीन टि२० आई खेलको सिरिज हुनेछ । दोस्रो खेल आइतबार र तेस्रो खेल बुधबार हुनेछ ।

भारत र आयरल्यान्डबीच पाँच टि२० आई खेल भएको छ । सबै खेलमा भारत विजयी भएको छ । गतवर्ष जुनमा आयरल्यान्डले २ सय २६ रनको विशाल विजयी लक्ष्य पछ्याउनेक्रममा २० ओभरमा ५ विकेट गुमाउँदै २ सय २१ रन बनाएको थियो ।