एजेन्सी – एसिया कप आगमी अगष्ट ३० देखी पाकिस्तान र श्रीलंकामा हुँदैछ । नेपाल बाहेक अन्य पाँच टोलीलाई एसिया कप आगमी अक्टोबर नोभेम्बरमा भारतमा हुने एकदिवसीय विश्वकपको अन्तिम तयारी हुनेछ ।

नेपालले पहिलो पटक एसिया कप खेल्दैछ । अन्य देशले उपाधि र विश्वकपको तयारी गर्दा नेपालले आफ्नो क्रिकेट विश्वलाई देखाउन चाहन्छ । एसिया कप ३० अगष्ट देखी १७ सेप्टेम्बरसम्म हुनेछ । समूह ए मा नेपाल, भारत र पाकिस्तान छन् । समूह बी मा बंगलादेश, श्रीलंका र अफगानिस्तान छन् ।

एसियाका मैदान स्पिनर सहयोगी मानिन्छ । त्यसैले एसिया कपमा स्पिनरहरु हाबी हुन सक्छन् । वर्तमान विश्व क्रिकेटका चार लेग स्पिनर एसिया कपका प्रमुख हतियार समेत हुन् । एसिया कप खेल्ने सबै टोलीका प्रमुख यी ६ स्पिनर जसले प्रतियोगितामा सानदार प्रदर्शन गर्न सक्छन् ।

६.सन्दीप लामिछाने – नेपाल

लेग स्पिनर सन्दीप लामिछाने नेपालका प्रमुख हतियार हुन् । इन्डियन प्रिमियर लिग (आइपिएल) देखी विग ब्यास लिगसम्म खेलेका सन्दीपलाई विश्व स्टारविरुद्ध खेलेको राम्रो अनुभव छ ।

त्यो अनुभव उनले एसिया कपमा देखाउनु पर्ने हुन्छ । सन्दीप ओडिआई इतिहासमा सर्वाधिक छिटो १ सय विकेट लिने खेलाडी हुन् । सन्दीपले अफगानिस्तानका राशिद खानको ४४ खेलको कीर्तिमान तोड्दै ४२ खेलमा उक्त सफलता हात पारेका थिए ।

२३ वर्षीय सन्दीपले ४९ ओडिआई खेलमा १ सय ११ विकेट लिएका छन् । सन्दीप लेगस्पिन र गुगलीका लागि चिनिन्छन् । अर्कोतर्फ आइपिएल लगायत विश्व चर्चित विदेशी फ्रेन्चाइज लिगमा फर्किन सन्दीपलाई एसिया कपमा भारत र पाकिस्तानविरुद्ध राम्रो प्रदर्शन गर्नुपर्ने दबाब पनि हुनेछ । सन्दीपले ग्लोबल टि२० क्यानडामा राम्रो प्रदर्शन गर्दै उत्कृष्ट लयको सम्भावना पनि देखाएका छन् ।

५.शादब खान – पाकिस्तान

पाकिस्तानका उप–कप्तान शादब खानबाट टोली उत्कृष्ट प्रदर्शन चाहन्छ । २४ वर्षीय लेग स्पिनर शादबले पाकिस्तानको टोलीबाट २०१७ देखी लगातार राम्रो प्रदर्शन गर्दै आएका छन् । आफ्नो अनुभवको फाइदा उठाउँदै सानदार प्रदर्शन गर्न सक्छन् । उपकप्तान हुँदा जिम्मेवारी पनि बढी हुनेछ ।

उनले पाकिस्तानबाट ६ टेस्ट, ५६ ओडिआई र ९२ टि२० आई खेल खेलेका छन् । टेस्टमा १४, ओडिआईमा ७३ र टि२० आईमा १ सय ४ विकेट लिएका छन् । उनीसँग दबाबमा खेल्ने राम्रो बानीछ । एसिया कपमा सानदार प्रदर्शन गर्न सक्छन् ।

४.मेहेदी हसन मिराज– बंगलादेश

अफस्पिनर मेहेदी हसन मिराज एसिया कपमा सानदार प्रदर्शन गर्ने सक्ने युवा खेलाडी हुन् । बंगलादेशबाट उनले लगातार सानदार प्रदर्शन गर्दै आएका छन् । २५ वर्षीय उनीसँग ३९ टेस्ट, ७७ ओडिआई र २५ टि२० आईको अनुभव छ । उनले टेस्टमा १ सय ५१, ओडिआईमा ८८ र टि२० आईमा १३ विकेट लिएका छन् ।

गत डिसेम्बरमा भारतविरुद्ध तीन ओडिआई खेलको सिरिज २-१ ले जिताउन सानदार प्रदर्शन गरेका थिए । पहिलो खेलमा ३८ रन बनाउनुको साथै १ विकेट लिएका थिए । दोस्रो खेलमा १ सय रन बनाउनुको साथै दुई विकेट लिएका थिए । मिराजले तल्लोक्रममा राम्रो ब्याटिङको क्षमता राख्छन् ।

३.कुलदीप यादव – भारत

भारतीय स्पिनर कुलदीप यादव राम्रो लयमा छन् । च्याइनाम्यान स्पिनर कुलदीपको बल खेल्न विपक्षी ब्याटरलाई सहज हुने छैन । दुई साता अघि कुलदीपले वेस्टइन्डिज भ्रमणमा सानदार प्रदर्शन गरेका थिए । कुलदीप ब्याटरको कमजोरी अनुसार बलिङ गर्ने क्षमता राख्छन् ।

उपाधिको प्रमुख टोली भारतमा थुप्रै स्टार खेलाडी छन् । उनी बिना दबाब खुलेर बलिङ गर्ने गर्दछन् । भारतीय टोलीमा उनले लामो समयपछि पुनरागमन गरेका हुन् ।

निरन्तर भारतीय टोलीमा स्थान बनाउन उनलाई उत्कृष्ट प्रदर्शनको दबाब समेत हुनेछ । भारतीय र आइपिएलको राम्रो अनुभव छ । उनले ८ टेस्ट, ८४ ओडिआई र ३२ टि२० आई खेल खेलेका छन् ।

२.वानिन्दु हसरंगा– श्रीलंका

श्रीलंकाका स्पिनर वानिन्दु हसरंगाले विश्व क्रिकेटमा लगातार सानदार प्रदर्शन गर्दै आएका छन् । श्रीलंकालाई विश्वकप छनोटको उपाधि जिताउँदै विश्वकपमा पुर्याउन हसरंगाले सानदार प्रदर्शन गरेका थिए ।

लंका प्रिमियर लिगमा वानिन्दुले ब्याटिङ र बलिङ दुबैमा सानदार प्रदर्शनक साथ शीर्ष स्थानमा छन् । हरंगासँग बलिङमा थुप्रै भेरियसन छन् । जसको कारण उनले ब्याटर र कन्डिसन अनुसार बलिङ गर्ने गर्दछन् । त्यसैको कारण विपक्षी ब्याटरमाथि उनी हाबी हुँदै आएका छन् ।

२६ वर्षीय हसरंगा आफ्नो उच्च लयलाई निरन्तरता दिँदै श्रीलंकालाई उपाधि जिताउन चाहन्छन् । गतवर्ष टि२० एसिया कपको उपाधि जिताउन हसरंगाको प्रदर्शन महत्वपूर्ण थियो ।

१.राशिद खान – अफगानिस्तान

राशिद खान वर्तमान समयका विश्व क्रिकेटका उत्कृष्ट लेग स्पिनर हुन् । उनले अफगानिस्तानको टोली र फ्रेन्चाइज लिग दुबैमा सानदार प्रदर्शन गर्दै आएका छन् ।

उनको बल खेल्न विश्व स्टारलाई पनि सहज हुदैन । लेग स्पिनसँगै क्विक बल गर्ने हुँदा ब्याटरलाई उनको बल रिड गर्न कठिन पर्ने गर्दछ । २४ वर्षीय अफगानी खानले ८९ ओडिआई खेलमा १ सय ६७ विकेट लिएका छन् ।

८२ टि२० आई खेलमा १ सय ३० विकेट लिएका छन् । एसिया कपमा पनि राशिद खान हाबी हुनसक्छन् ।