एजेन्सी – बी लव कान्डीले लंका प्रिमियर लिग (एलपिएल) २०२३ को फाइनलमा डम्बुला आरालाई पाँच विकेटले हराउँदै उपाधि जितेको छ ।

जितको लागि १ सय ४८ रनको विजयी लक्ष्य पछ्याएको कान्डीले १९.५ ओभरमा ५ विकेट गुमाउँदै पूरा गर्यो । कप्तान एन्जिलो म्याथ्युजले २१ बलमा ३ चौकासहित २५ रनको प्लेयर अफ द म्याच प्रदर्शन गरे ।

कामिन्दु मेन्डिस ३७ बलमा ३ चौका र १ छक्कासहित ४४, मोहम्मद हरिस २६, दीनेश चान्डिमल २४ र आसिफ अली १९ रनमा आउट भए ।

डम्बुलाका स्पिनर नुर अहमदले ४ ओभरमा २७ रन खर्चेर ३ विकेट लिए । तीव्र गतिका बलर बिनुरा फ्रेनान्डोले ४ ओभरमा ३१ रन खर्चेर २ विकेट लिए ।

त्यसअघि कोलोम्बोमा टस जितेर पहिला ब्याटिङ रोजेको डम्बुलाले निर्धारित २० ओभरमा ४ विकेट गुमाउँदै १ सय ४७ रन बनाएको थियो ।

उसका लागि धनन्जय डि सिल्भाले २९ बलमा ३ छक्कासहित सर्वाधिक ४० रनको योगदान दिए । सदिरा समाराविक्रमा ३० बलमा ५ चौकासहित ३६, कुशल मेन्डिस २२, अविष्का फ्रेनान्डो ५ र कुशल परेराले ३१ रन बनाए ।

कान्डीका लागि चतुरांगा डी सिल्भाले ४ ओभरमा २५ रन खर्चेर २ विकेट लिए । नुवान प्रदीप र मोहम्मद हसनैनले समान एक विकेट लिए ।

चोटका कारण वानिन्दु हसरंगा फाइनल खेलेका थिएनन् । उनले सर्वोत्कृष्टसहित उत्कृष्ट बलर र ब्याटर दुबै अवार्ड जिते । उनले प्रतियोगिताभर १० खेलमा २ सय ७९ रन बनाउनुको साथै १९ विकेट लिएका थिए ।