एजेन्सी – पाकिस्तानले पहिलो ओडिआई खेलमा अफगानिस्तानलाई ५९ रनमा अल आउट गर्दै १ सय ४२ रनको सानदार जित हात पारेको छ । योसँगै तीन ओडिआई खेलको सिरिजमा पाकिस्तानले १-० को अग्रता लिएको छ ।

जितको लागि २ सय २ रनको मध्यम विजयी लक्ष्य पछ्याएको अफगानिस्तान १९.२ ओभरमा ५९ रनमा अल आउट भयो । अफगानिस्तानका आजमतुल्लाह ओमरजाई १६ र रहमानउल्लाह गुरबाजले १८ रन बनाए ।

अन्य कुनैपनि अफगानिस्तानका ब्याटरले दोहोरो अंकमा रन बनाउन सकेनन् । शीर्षक्रमका ब्याटर इब्राहिम जद्रान, रहमात शाह र हशमतुल्लाह शाहिदी डक आउट भएका थिए ।

अफगानिस्तान २०१६ मा जिम्बावेसँग ५८ रनमा अल आउट भएको थियो । त्यसपछि दोस्रो कम अफगानिस्तानको ओडिआई योगफल हो ।

पाकिस्तानका हरिस रौफले ६.२ ओभरमा २ मेडनसहित १८ रन खर्चेर ५ विकेट लिए । शाहिन शाह अफ्रिदीले ४ ओभरमा २ मेडनसहित ९ रन खर्चेर २ विकेट लिए । नसिम शाहले एक विकेट लिए ।

त्यसअघि श्रीलंकाको महिन्दा राजपक्ष इन्टरनेशल रंगाशालामा टस जितेर पहिला ब्याटिङ रोजेको पाकिस्तान ४७.१ ओभरमा २ सय १ रनमा अल आउट भएको थियो ।

पाकिस्तानका ओपनर इमाम उल हकले ९४ बलमा २ चौकासहित सर्वाधिक ६१ रनको योगदान दिएका थिए । उनी मोहम्मद नाबीको बलमा राशिद खानबाट समातिन पुगेका थिए ।

ओपनर फखार जमान २ रनमै तीव्र गतिका बलर फजलहक फारुकीको बलमा क्याच आउट भएका थिए । पाकिस्तानका १० मध्य ८ खेलाडी अफगानिस्तानको स्पिनरको शिकार बनेका थिए । बाँकी दुई एक रन आउट र एक तीव्र गतिका बलरमा आउट भए ।

पाकिस्तानका कप्तान बाबर आजम शून्यमा आउट हुनु ठूलो भारी पर्यो । स्पिनर मुजिब उर रहमानले बाबरलाई शून्यमा एलबीडब्लू आउट गरेपछि पाकिस्तान सम्हाल्लिन सकेको थिएन । मोहम्मद रिजवान २२ बलमा ४ चौकासहित २१, अघा सलमान ७, उस्मा मिर र शाहिन शाह अफ्रिदी समान दुई रनमा आउट भएका थिए ।

मध्यक्रमका ब्याटर इफ्तिखर अहमद ३० र शादब खान ३९ रनमा आउट भए । नसिम शाह २७ बलमा २ चौकासहित १८ रनमा अविजित रहे ।
अफगानिस्तानका स्पिनर मुजिब उर रहमानले १० ओभरमा १ मेडनसहित ३३ रन खर्चेर ३ विकेट लिए । मोहम्मद नाबीले १० ओभरमा ३४ रन खर्चेर २ विकेट लिए । प्रमुख स्पिनर राशिद खानले १० ओभरमा ४२ रन खर्चेर २ विकेट लिए । रमात शाह र फारुकीले समान एक विकेट लिए । दोस्रो खेल बिहीबार र तेस्रो खेल शनिबार हुनेछ ।