एजेन्सी – ओपनर रहमानउल्लाह गुरबाजको सानदार शातकमा अफगानिस्तानले दोस्रो ओडिआई खेलमा पाकिस्तानलाई ३ सय १ रनको बलियो लक्ष्य दिएको छ । श्रीलंकाको हम्बान्टोतामा टस जितेर पहिला ब्याटिङ रोजेको अफगानिस्तानले निर्धारित ५० ओभरमा ५ विकेट गुमाउँदै ३ सय रन बनायो ।

पहिलो खेलमा मात्रै ५९ रनमा अल आउट भएको अफगानिस्तानलाई बलियो योगफलमा पुर्याउन ओपनर रहमानउल्लाह गुरबाज र इब्राहिम जद्रानले दोहोरो शतकीय साझेदारी गरेका थिए ।

गुरबाजले १ सय ५१ बलमा १४ चौका र ३ छक्कासहित सर्वाधिक १ सय ५१ रनको शतकीय इनिङ खेले । यो उनको ओडिआइ करिअरको पाँचौ र उत्कृष्ट प्रदर्शन हो ।

यसअघि उनको ओडिआईमा उच्च प्रदर्शन गत जुलाईमा बंगलादेशविरुद्ध १ सय ४५ रन थियो । अफगानिस्तानबाट इब्राहिम जद्रानले गतवर्ष नोभेम्बरमा श्रीलंकाविरुद्ध खेलेको १ सय ६२ रनको इनिङ पछि यो उच्च इनिङ हो ।

पहिलो विकेटका लागी रहमानउल्लाह गुरबाज र इब्राहिम जद्रानले ३९।५ ओभरमा २ सय २७ रनको दोहोरो शतकीय साझेदारी गरेका थिए । इब्राहिम जद्रान १ सय १ बलमा ६ चौका र २ छक्कासहित ८० रनमा आउट भए ।

यो अफगानिस्तानबाट कुनैपनि विकेटका लागि दोस्रो उच्च साझेदारी हो । अफगानिस्तानबाट ओडिआईमा उच्च साझेदारी यी दुई ब्याटरले नै पहिलो विकेटका लागि यसै वर्ष बंगलादेशविारुद्ध २ सय ५६ रनको साझेदारी गरेका थिए ।

स्पिनर उस्मा मिरले जद्रानलाई इफ्तिखर अहमदबाट क्याच गराउँदै साझेदारी तोडेका थिए । गुरबाज शाहिन शाह अफ्रिदीको ४४ औं ओभरको दोस्रो बलमा विकेटकिपर मोहम्मद रिजवानबाट क्याच आउट हुन पुगे ।

यी दुई ब्याटर बाहेक अन्य खेलाडीले राम्रो प्रदर्शन गर्न गर्न नक्दा विशाल योगफल खडा गर्न चुकेको थियो । मोहम्मद नाबी २९, राशिद खान २, शाहिदुल्लाह १ रनमा आउट भए । कप्तान हश्मातुल्लाह शाहिदी १५ रनमा नटआउट रहे ।

पाकिस्तानका शाहिन शाह अफ्रिदीले १० ओभरमा ५८ रन खर्चेर २ विकेट लिए । नसिम शाह र उस्मा मिरले एक एक विकेट लिए । तीन खेलको ओडिआई सिरिजमा पाकिस्तान १-० ले अघि छ । पहिलो खेलमा पाकिस्तान १ सय ४२ रनले विजयी भएको थियो ।