एजेन्सी – श्रीलंकाका स्टार स्पिन अलराउन्डर वानिन्दु हसरंगाले बुधबारदेखी सुरु हुने एसिया कप गुमाउने भएका छन् । हसरंगा अघिल्लो साता लंका प्रिमियर लिग खेल्नेक्रममा घाइते भएका थिए । त्यसैको कारणले उनले एसिया कप पुरै गुमाउने भएका छन् ।

श्रीलंकाले दासुन शानकाको कप्तानीमा १५ सदस्य टोली घोषणा गरेको छ । जसमा प्रमुख अलराउन्डर हसरंगासँगै युवा ओपनर अविष्का फ्रेनान्डो पनि छैनन् । अविष्का भने कोरोनाको कारण नभएका हुन् । वानिन्दुको भने खुट्टाको मांशपेशीमा समस्या आएको थियो ।

वानिन्दु नहुँदा श्रीलंकाको बलिङ आक्रामण कमजोर बन्नेछ । लंका प्रिमियर लिगमा बी लव कान्डीको कप्तानी गर्दै उनले सर्वाधिक रन बनाउने र विकेट लिने दुबै अवार्ड जितेका थिए । फाइनल भने हसरंगाले चोटका कारण खेलेका थिएनन् ।
श्रीलंका, बंगलादेश र अफगानिस्तान समूह बी मा छन् ।

समूह ए मा नेपाल, भारत र पाकिस्तान छन् । श्रीलंकाले पहिलो खेल ३१ अगष्टमा बंगलादेश र ५ सेप्टेम्बरमा अफगानिस्तानसँग खेल्नेछ । अफगानिस्तानसँग भने लाहोरमा खेल्नेछ । शीर्ष दुईमा रहन सके सुपर फोरमा स्थान बनाउनेछ ।

श्रीलंकाको टोली :

दासुन शानका (कप्तान), पाथुम निसांका, दिमुथ करुणारत्ने, कुशल परेरा, कुशल मेन्डिस (उपकप्तान), चरिथ असलंका, धनन्जय डि सिल्भा, सदिरा समाराविक्रमा, महेश थिक्सेना, दुनिथ वेलाजिगे, मथिसा पाथिराना, कसुन रजिथा, दुशान हेमान्था, बिनुरा फ्रेनान्डो र प्रमोद मदुशान ।