काठमाडौं (हाम्रो खेलकुद) – नेपालले एसिया कपमा आज विश्व क्रिकेटको पावर हाउस भारतसँग खेल्दैछ । खेल नेपाली समय अनुसार दिउँसो ३ : १५ मा पालेकेले इन्टरनेशल क्रिकेट स्टेडियममा सुरुहुनेछ । नेपालले आफ्नो क्रिकेट इतिहासमा भारतविरुद्ध खेल्दैछ ।

नेपाली समय अनुसार दिउँसो २ः ४५ मा रोहित पौडेल टसका लागि जानेछन् । उनले टस भारतीय कप्तान रोहित शर्मासँग गर्नेछन् । जव रोहित टसका लागी जानेछन् त्यो नेपालको लागि एउटा ठूलो गर्वको क्षण हुनेछ । रोहित पौडेलका आदर्श खलाडी हुन् रोहित शर्मा । उनीसँगै टस गर्नेछन् । यस्तो अवसर विरलै खेलाडीले पाउँछन् ।

भारत नेपालको सबैभन्दा नजिकको छिमेकी हो । तर सिनियर स्तरमा भारतसँग भिड्न नेपालले २७ वर्ष पर्खनु पर्यो । नेपालले सन् १९९६ बाट अन्तर्राष्ट्रिय क्रिकेट खेल्न थालेको हो । भारत र पाकिस्तानसँग पहिलो पटक खेल्ने अवसर पाएको हो । भारत र पाकिस्तानसँग खेल्न पाउनुनै नेपाल जस्तो देशका लागि एउटा उपलब्धी हो ।

भारतले टस जिते वा हारेपनि पहिला ब्याटिङ गर्ने सम्भावना देखिन्छ । भारत नेपालविरुद्ध रनको वर्षा गराउने रणनीतिमा हुनेछ । नेपाल आफ्नो बलिङ परिक्षा गर्न चाहन्छ । पाकिस्तानलाई नेपालले ५० ओभरमा ३ सय ४२ रन दिएको थियो । बाबर आजमले १ सय ५१ र इफ्तिखार अहमदले १ सय ९ रनको शतकीय इनिङ खेलेका थिए ।

पहिलो खेलमा नेपाल २ सय ३८ रनले पराजित भएको थियो । तर भारत र पाकिस्तानसँग खेल वर्षाको कारण रद्द भयो । यदि यस खेलमा नेपाल विजयी भएमा सुपर फोरमा पुग्नेछ । वर्षाले प्रभावित हुँदै रद्द भएमा वा नेपाल पराजित भएमा भने बाहिरिनुपर्ने हुन्छ ।

विश्व क्रिकेटका दुई उत्कृष्ट ब्याटर विराट कोहली र रोहित शर्मासँग खेल्ने दुर्लभ अवसर नेपाली खेलाडीले पाउनेछन् । सायद यी दुई खेलाडीसँगको खेल यो नै अन्तिम हुनसक्छ । अर्को पटक एसिया कपमा नेपालले स्थान बनाउँछ वा बनाउँदैन थाहा छैन ।

विश्वकपपछि रोहित शर्माले सन्न्यास लिने सम्भावना बढाी छ । कोहली पनि अव भारतीय टोलीबाट धेरै लामो समय खेल्ने छैनन् ।
भारत र विराट कोहलीसँग खेल्न पाउने हरेक नेपाली क्रिकेट समर्थक, शुभचिन्तक र खेलाडीको सपना त्यो पूरा हुनेछ । २ सय ७६ ओडिआईमा ४६ शतक र ६५ अर्धशतकका साथ कोहलीले १२ हजार ९ सय २ रन बनाएका छन् ।

पछिल्लो एक दशकयताका सर्वाधिक सफल ब्याटर भन्दा कुनै फरक नपर्ला । हरेक नेपाली बलरलाई कोहलीको विकेट सपना हुनेछ । कोहली नेपालविरुद्ध कसरी उत्रिन्छन् त्यो हेर्न बाँकी छ ।

रोहितले ओडिआईमा २ सय ४५ ओडिआईमा ३० शतक र ३ दोहोरो शतकमा झण्डै १० हजार रन बनाएका छन् । श्रेयस ऐर, ईशान किशन र हार्दिक पान्ड्याले गर्दा भारतको मध्यक्रम मजबुत छ ।

भारतले आफ्ना बेन्चमा रहेका तिलक बर्मा र सूर्यकुमार यादवलाई मौका दिनसक्छ । रविन्द्र जडेजा अलराउन्डरको रुपमा खेल्नेछन् । बलिङमा उनले कुलदीप यादवलाई साथ दिनेछन् । मोहम्मद शामी, मोहम्मद शिराज र शार्दुल ठाकुर तीव्र गतिका बलर हुनेछन् ।

भारतका प्रमुख बलर जस्प्रित बुमराहले भने नेपालसँगको खेल गुमाउनेछन् । उनी ब्यक्तिगत कारण भारत फर्किएका छन् । भारतले बुमराहको स्थानमा शामीलाई खेलाउनेछ । बेन्चका खेलाडीलाई मौका दिनसक्छ ।

यता नेपालले टोलीमा परिवर्तन गर्ने सम्भावना कम छ । पिच स्पिनर सहयोगी हुँदा ललितनारायण राजवंशी खेल्नेछन् । अन्य खेलाडीमा परिवर्तनको सम्भावना छैन । नेपाली खेलाडीको लागि यो ठूलो अवसर हो । धेरै नेपाली खेलाडीको आइपिएल खेल्ने सपना छ । त्यो सपना पूरा गर्न आज राम्रो गर्नुपर्ने हुन्छ ।

नेपाललाई गुमाउनु केहि छैन । हार स्वभाविक हो । तर आफ्नो उत्कृष्ट क्रिकेट भने देखाउन सक्नुपर्छ । कुशल भुर्तेल, रोहित पौडेल, आसिफ शेख र आरिफ शेख ब्याटर हुन् । कप्तान रोहित र कुशल भुर्तेल प्रमुख ब्याटर हुन् ।

यी दुईबाट नेपाल उच्च प्रदर्शन चाहन्छ । पाकिस्तानसँग नेपालको ब्याटिङक्रम केहि असन्तुलित बनेको थियो । कुशल मल्लले तल्लोक्रममा खेलेका थिए । कुशललाई नेपालले पाँचौं नम्बरमा खेलाउने सम्भावना देखिन्छ । कुशल मल्ल र गुलशन झा आक्रामक ब्याटर हुन् । यी दुई खेलाडीको प्रदर्शनमा धेरैको नजर हुनेछ ।

तीव्र गतिका बलरमा करण केसी र सोमपाल कामी हुनेछन् । पावर प्लेमा दुबै बलरले राम्रो प्रदर्शन गर्दै आएका छन् । डेथ ओभर नेपाली क्रिकेटको ठूलो समस्या हो । सन्दीप भारतलाई घातक बन्न सक्छन् । सन्दीपले २०१८ देखी २०२१ सम्म आइपिएलमा भारतका सबै खेलाडीविरुद्ध खेलेको अनुभव छ ।

विदेशी लिग खेलेका हुँदा सन्दीपको उत्कृष्ट प्रदर्शनमा नेपाले चमात्कार प्रदर्शन गर्न सक्छ । नेपाल सन्दीपबाट अद्भूत प्रदर्शन चाहन्छ । २०२१ देखी आइपिएलमा नभएका सन्दीपलाई आफ्नो खेल देखाउने यो सबैभन्दा राम्रो अवसर समेत हो । नेपाल र भारतबीचको खेल हुने समयमा वर्षा हुने सम्भावना ८० प्रतिशत सम्म छ । वर्षा नेपालको ऐतिहासिक खेलमा बाधक बन्नसक्छ ।