काठमाडौं (हाम्रो खेलकुद) – भारतले एसिया कपमा नेपालले दिएको प्रतिस्पर्धात्मक विजयी लक्ष्य पछ्याउनेक्रममा वर्षाको कारण खेल रोकिएको छ ।

पालेकेले इन्टरनेशल क्रिकेट स्टेडियममा नेपालले दिएको २ सय ३१ रनको विजयी लक्ष्य पछ्याएको भारतले २.१ ओभरमा १७ रन बनाउँदा वर्षाको कारण खेल रोकिएको छ । शुभमन गिल ६ बलमा ३ चौकासहित १२ रनमा क्रिजमा छन् । रोहित शर्मा ७ बलमा १ चौकासहित ४ रनमा क्रिजमा छन् ।

नेपालका तीव्र गतिका बलर करणले केसीले पहिलो ओभरमा मात्रै एक रन दिँदै उत्कृष्ट सुरुवात दिलाएका थिए । त्यो एक रन पनि वाइड थियो । तेस्रो बलमा रोहित शर्माको एलबीडब्लू आउट माग गर्दै रिभ्यू लिएपनि नेपाल सफल हुन सकेन । दोस्रो ओभरमा सोमपाल कामीलाई शुभमन गिलले तीन चौका प्रहार गरेका थिए ।

नेपालले ब्याटिङ गर्दा वर्षाको कारण झण्डै एक घण्टा खेल रोकिएको थियो । अतिरिक्त समय एक घण्टामात्रै थियो । त्यसैले अव पुन खेल सुरु हुँदा ओभर घट्ने देखिन्छ ।

त्यसअघि टस हारेर पहिला ब्याटिङको निम्तो पाएको नेपाल ४८.२ ओभरमा २ सय ३० रनमा अल आउट भएको थियो । नेपालका लागि ओपनर तथा विकेटकिपर आसिफ शेख ९७ बलमा ८ चौकासहित सर्वाधिक ५८ रनको योगदान दिए ।

अर्का ओपनर कुशल भुर्तेलले २५ बलमा ३ चौका र २ छक्कासहित ३८ रनको आक्रामक इनिङ खेलेका थिए । सोमपाल कामीले ५६ बलमा १ चौका र २ छक्कासहित ४८ रनको महत्वपूर्ण योगदान दिएका थिए ।