काठमाडौं (हाम्रो खेलकुद) – नेपाली क्रिकेट टोली एसिया कपमा भारत र पाकिस्तानसँग खेलेर आज दिउँसो स्वदेश फर्किएको छ । नेपाली क्रिकेट टोलीका कप्तान रोहित पौडेलले भारत र पाकिस्तानसँग खेल्ने सपना पूरा भएको बताउँछन् ।

‘भारत र पाकिस्तानसँग खेल्ने सपना थियो । त्यो पूरा भएपछि एकदमै खुसी लागेको छ । टिमले राम्रो अनुभूती गरेको छ’, नेपाल फर्किएपछि रोहितले भने ।

नेपालले पाकिस्तानविरुद्ध सुरुवातमा राम्रो बलिङ गरेको थियो । तर अन्तिम १५ ओभर नेपालले सोचे जस्तो हुन सकेन । डेथ ओभर अर्थात अन्तिम १० ओभरमा नेपालले १ सय २९ रन खर्चिएको थियो ।

‘पाकिस्तानसँग हामीले ३५ ओभर सम्म एकदमै राम्रो बलिङ गर्यौ । किनभने विश्वका उत्कृष्ट ब्याटर पाकिस्तानका अगाडी थिए । त्यो खेलमा बलिङ एकदमै राम्रो थियो । भारतविरुद्ध कुशल र आसिफले जुन सुरुवात दिलाए त्यो एकदमै राम्रो थियो । मध्यक्रममा अझै राम्रो गर्न सकिन्थ्यो । समग्रमा एकदमै राम्रो खेल्यौं । विशेषगरि ब्याटिङ युनिट’, रोहितले भने ।

रोहितले नेपाली क्रिकेटको लागि यो वर्ष एकदमै राम्रो भएको बताएका छन् । ‘मलाई लाग्छ यो वर्ष नेपाली क्रिकेटलाई एकदमै राम्रो भएको छ । लिग–२ खेल्नु अघि हामी जुन अवस्थामा थियौं यस्तो कसैले सोचेको थिएन । सबै खेलाडीको विश्वास थियो । कडा मिहिनेत पनि हो । प्रशिक्षकहरुको प्रयास पनि हो । सबै जोडेपछि एकदमै राम्रो उपलब्धी भयो’, उनले भने ।

रोहितको पूरा भिडियो हेर्नुहोस् :