एजेन्सी – श्रीलंकाका युवा स्पिनर दुनिथ वेलालेजले एसिया कपको सुपर फोर खेलमा भारतका शीर्ष तीन ब्याटर विराट कोहली, रोहित शर्मा र शुभमन गिललाई आउट गर्दै टोलीलाई खेलमा फर्काएका छन् । कोलोम्बोमा टस जितेर पहिला ब्याटिङ रोजेको भारतले १७ ओभरमा ३ विकेट गुमाउँदै ९७ रन बनाएको छ ।

भारतका ईशान किशन र लोकेश राहुल ३(३ रनमा क्रिजमा छन् । रोहित शर्मा ४८ बलमा ७ चौका र २ छक्कासहित ५३ रनमा आउट भए । दुनिथले ३ ओभरमा १ मेडनसहित ४ रन खर्चेर ३ विकेट लिएका छन् ।

भारतलाई ओपनर शुभमन गिल र रोहित शर्माले ११.१ ओभरमा ८० रनको साझेदारी गरेका थिए । दुनिथले आफ्नो पहिलो बलमै शुभमन गिललाई १९ रनमा बोल्ड गर्दै श्रीलंकालाई पहिलो सफलता दिलाए । दुनिथले १४ औं ओभरको पाँचौं बलमा विराट कोहलीलाई ३ रनमा दासुन शानकाबाट क्याच आउट गराए ।

कोहली मिडअनमा क्याच आउट हुन पुगेका थिए । १६ औं ओभरको पहिलो बलमा उनले रोहित शर्मालाई ५३ रनमा बोल्ड आउट गरेका हुन् । श्रीलंकाका प्रमुख स्पिनर वानिन्दु हसरंगा चोटका कारण टोलीमा नहुँदा उनले खेल्ने मौका पाएका छन् ।

समूह चरणमा अफगानिस्तानलाई दुई रनले हराउन उत्कृष्ट प्रदर्शन गरेका थिए । २० वर्षीय स्पिनर दुनिथले ३३ रन बनाउनुको साथै २ विकेट लिएपछि श्रीलंकाले सुपर फोरमा स्थान बनाएको थियो ।