काठमाडौं (हाम्रो खेलकुद) – नेपाली क्रिकेट टोलीका विकेटकिपर विनोद भण्डारीले नेपालको लागि अव टि२० विश्वकप टाढा नभएको बताएका छन् । एक वर्षपछि नेपाली टोलीमा फर्किएका उनले चीनमा दुई सातापछि हुने १९ औं एसियाली खेलकुदको प्रशिक्षणको क्रममा हाम्रो खेलकुदसँग बोल्दै उक्त प्रतिक्रिया दिएका हुन् ।

‘खेल्दा आफूलाई जहिले पनि सहज नै लाग्छ । टिमको आवश्यकता अनुसार छनोट हुने हो । हामी खाली समयमा पनि क्रिकेट खेली राखेका थियौं । टिम बाहिर बसेपछि त्यस्तो फरक देखिन्छ भन्ने हुँदैन । लगातार क्रिकेट खेलेको हुँदा त्यस्तो सोच्नु पर्छ जस्तो लाग्दैन’, विनोदले पूनरागमन बारे भने ।

क्यानले विनोद भण्डारी, विवेक यादव, कमलसिंह ऐरी, सागर ढकाल, लोकेश बम र विवेक यादवलाई एक महिना भारतमा अभ्यास गर्न पठाएको थियो । दिल्लीको अभ्यासले सजिलो भएको बताउँछन् ।

‘यहाँ बसेको भए वर्षाको कारण केहि गर्न मिल्ने थिएन । तर दिल्लीमा हरेक दिन खेल खेल्न मिलेको थियो । त्यसल गर्दा सजिलो भयो । अभ्यासमा कोच पनि हुनुन्थ्यो । टि२० को दिनमा दुई खेल खेलेका थियौं । भारतको अभ्यासले धेरै सहज भएको छ’, उनले भने ।

विनोद २०२२ को जुलाईमा स्कटल्यान्ड भ्रमणपछि नेपाली टोलीमा छैनन् । नेपालको पहिलो रोजाईका विकेटकिपर भएपनि अपेक्षा अनुसार रन बनाउन नसकेपछि बाहिर बस्नु परेको थियो । विकेटकिपर आसिफ शेख र अर्जुन साउदका साथ नेपाल अघि बढेपछि उनलाई टोलीमा फर्किन केहि गाह्रो भएको थियो ।

सन् २००९ देखी नेपाली टोलीबाट खेल्दै आएका उनले हालसम्म सिनियर टोलीबाट शतक बनाउन सकेका छैनन् । घरेलु क्रिकेटमा भने विनोदले शतक हानेका छन् । तल्लोक्रममा खेल्ने हुँदा शतक कठिन हुने विनोद बताउँछन् ।

‘मैले खेलेको ब्याटिङक्रम हेर्ने हो भने ५ देखी ७ सम्म छ । त्यहाँबाट शतक आउने एकदमै कम हुन्छ । शीर्षक्रममा ब्याटिङ गर्दा हेरौ कस्तो हुन्छ । शीर्षक्रमका ब्याटरले राम्रो गर्दा सबै खेल जित्ने सम्भावना हुन्छ’, उनले भने । १९ औं एसियाली खेलकुदमा नेपालले समूह चरणमा मंगोलिया र माल्दिभ्ससँग खेल्नेछ । क्वाटरफाइनलमा नेपालले बंगलादेश, पाकिस्तान, भारत र श्रीलंका ए मध्य एकसँग खेल्नेछ ।

१९ औं एसियाली खेलकुदमा विनोदले नेपालबाट ओपनिङ गर्ने सम्भावना छ । उनी मेडलको लागि नै खेल्ने बताउँछन् । ‘मेडल भनेको मेडल हो । देशको लागि मेडल भनेको एकदमै महत्वपूर्ण कुरा हो । कोरियामा खेल्दा हामी एउटा खेलले पछि परेका थियौं । नत्र मेडल आई सकेको थियो । मेडलको लागि नै खेल्ने हो । पहिलो चरणमा गाह्रो छैन । दोस्रो चरणबाट अली कडा नै खेल हुन्छ । सबैले अलीकति प्रयास गर्यो भने त्यस्तो गाह्रो हुन्छ जस्तो मलाई लाग्दैन’, उनले भने ।

एसियाली खेलकुदपछि नेपालले घरेलु मैदानमा आइसिसी टि२० विश्वकप एसिया क्षेत्र छनोट खेल्नेछ । फाइनलमा स्थान बनाउन सके नेपालले २०२४ मा अमेरिका र वेस्टइन्डिजमा हुने टि२० विश्वकप खेल्न पाउनेछ । विनोद अव नेपालको विश्वकप त्यति टाढा नभएको बताउँछन् ।

‘घरेलु मैदानमा त लगभग सबैले सोच्नु हुन्छ होला नेपालले जिति हाल्छ । सबै खेलाडीको आफ्नो मिहिनेत छ । घरेलु मैदानमा फाइदा हुन्छ । घरेलु मैदानमा विश्वकप छनोट खेल्नुछ । अलिकति मिहिनेत गरे विश्वकप टाढा छैन जस्तो लाग्छ मलाई’, उनले भने ।

विनोद भण्डारीको पूरा भिडियो हेर्नुहोस् :