एजेन्सी – सकिब अल हसन र तौहिद हृदोयको अर्धशतकमा बंगलादेशले एसिया कपको अन्तिम सुपर फोर खेलमा भारतलाई २ सय ६६ रनको प्रतिस्पर्धात्मक लक्ष्य दिएको छ । कोलोम्बोमा टस हारेर पहिला ब्याटिङको निम्तो पाएको बंगलादेशले निर्धारित ५० ओभरमा ८ विकेट गुमाउँदै २ सय ६५ रन बनायो ।

बंगलादेशका कप्तान सकिब अल हसनले ८५ बलमा ६ चौका र ३ छक्कासहित सर्वाधिक ८० रनको इनिङ खेले । उनी शार्दुल ठाकुरको बलमा बोल्ड आउट भए ।

तौहिद हृदोयले ८१ बलमा ५ चौका र २ छक्कासहित ५४ रन बनाए । एक समय १४ ओभरमा ५९-४ को अवस्थामा पुगेको बंगलादेशलाई पाँचौं विकेटका लागि सकिब र हृदोयले १ सय १ रनको शतकीय साझेदारी गर्दै खेलमा फर्काएका थिए ।

सकिब ३४ औं ओभरको पहिलो बलमा बोल्ड आउट भएपछि ठूलो योगफलको सम्भावना सकिएको थियो । तल्लोक्रममा नासुम अहमदले ४५ बलमा ६ चौका र १ छक्कासहित ४४ रन बनाएका थिए । ओपनर तान्जिद हसन १३, लिटन दास डक, अनमुल हक ४, मेहेदी हसन मिराज १३ र शमिम हसन १ रनमा आउट भए ।

मेहेदी हसन २३ बलमा ३ चौकासहित २९ रनमा नटआउट रहे । डेब्यू खेल खेलेका तान्जिम हसन सकिब ८ बलमा १ चौका र १ छक्कासहित १४ रन बनाए ।

भारतका शार्दुल ठाकुरले १० ओभरमा ६५ रन खर्चेर ३ विकेट लिए । मोहम्मद शामीले ८ ओभरमा १ मेडनसहित ३२ रन खर्चेर २ विकेट लिए । प्रसिद्ध कृष्णा, अक्षर पटेल र रविन्द्र जडेजाले एक एक विकेट लिए ।

भारत फाइनलमा पुगि सकेको छ । उपाधिको लागि आइतबार श्रीलंकासँग खेल्नेछ । उता बंगलादेश सुपर फोरबाट बाहिरि सकेको छ ।