काठमाडौं (हाम्रो खेलकुद) – कुनैपनि निर्वाचनमा एक मतको ठूलो महत्व हुन्छ । एक मतले नै उम्मेद्धवारलाई जिताउने र हराउने गर्दछ । चुनाव जित्न मतमात्रै होईन कहिले काही भाग्यले पनि साथ दिनुपर्छ । नेपाल क्रिकेट संघ(क्यान) को केन्द्रिय चुनावमा दुई केन्द्रिय सदस्यको मत बराबर भएपछि चिट्ठाबाट विजयी घोषणा गर्नु परेको थियो।

मधेश प्रदेश कोटातर्फबाट माधव कर्माचार्य र मोहम्मद दाउद अन्सारीले समान ४२ मत प्राप्त गरे । समान मत भएपछि चिट्टाबाट विजयी घोषणा गर्नु परेको थियो । कर्माचार्य चिट्ठामा भाग्यशाली मानिए ।

कर्माचार्य सर्लाही जिल्ला क्रिकेटका अध्यक्ष हुन् । उनी यसअघि केन्द्रिय सदस्य समेत थिए । यसअघि क्यानका केन्द्रिय सदस्य समेत रहेका अन्सारी पछिल्लो क्यान कार्यसमितिको हरेक गलत गतिविधिको विरुद्धमा बोल्दै आएका थिए ।

उता खुल्लातर्फ सदस्यमा पनि करण महत्रा क्षेत्री र ऋषिराम गौतमले पनि समान २६ मत ल्याएका थिए । चिट्ठामार्फत क्षेत्री विजयी भए । मकवानपुर जिल्लाका अध्यक्ष क्षेत्री यसअघि पनि क्यानको केन्द्रिय सदस्य थिए । गण्डकी प्रदेशका गौतम यसअघि क्यानका केन्द्रिय सदस्य थिए । क्यानको गलत गतिविधिविरुद्ध गौतमले पनि आवाज उठाउदै आएका थिए ।

क्यानको सचिव पदमा पूर्वकप्तान पारस खड्काले प्रशान्त मल्ललाई ११ मतले पराजित गरे । कुल ८५ मतबाट पारसले ४८ र मल्लले ३७ मत प्राप्त गरे । अध्यक्ष चतुरबहादुर चन्द, उपाध्यक्ष रोशन सिंह र कोषाध्यक्ष पदम खड्का सर्वसम्मत रुपमा निर्वाचित भए ।

त्यस्तै महिला सदस्यतर्फ जयन्ती देवी भट्ट, लुम्बिनी प्रदेश कोटाबाट प्रदीप मजगैया र कर्णालीबाट श्रीधर केसी सर्वसम्मत निर्वाचित भएका थिए । अन्य १० सदस्यको लागि निर्वाचन गर्नु परेको थियो ।

प्रदेश कोटामा कोशीबाट अर्जुन पौडेल (४७), त्यस्तै बागमती प्रदेशबाट दिवाकर घले (४६), गण्डकी प्रदेशबाट सुदीप शर्मा (५२) र सुदूरपश्मिच प्रदेशबाट विक्रम विष्ट (४९) मतका साथ विजयी भए । खुल्लातर्फ सदस्यमा धिरेन्द्र साउद ६९, विरेन्द्र ३४, दुर्गाराज पाठक ५४ मत र आयुष श्रेष्ठ ५१ मतका साथ विजयी भए ।