हाङ्गचौं (हाम्रो खेलकुद) – तीव्र गतिका बलर अभिनाश बोहरा टि२० आईमा ६ विकेट लिने पहिलो नेपाली खेलाडी बनेका छन् । १९ औं एसियाली खेलकुद (एसियाड) मा माल्दिभ्सलाई १ सय ३८ रनले हराउन अभिनाशले आफ्नो करिअरकै उत्कृष्ट प्रदर्शन गरेका थिए ।

जितको लागि २ सय १३ रनको विशाल विजयी लक्ष्य पछ्याएको माल्दिभ्स १९.४ ओभरमा ७४ रनमा अल आउट भयो । नेपालको जितमा अभिनाश बोहराले ३.४ ओभरमा ११ रन खर्चेर सर्वाधिक ६ विकेट लिए ।

योसँगै उनी टि२० आईमा योसँगै ६ विकेट लिने पहिलो नेपाली खेलाडी बनेका छन् । यसअघि नेपालबाट सन्दीप लामिछाने र करण केसीले मात्रै टि२० आईमा एकै खेलमा ५–५ विकेट लिएका थिए ।

करणले २०२२ मार्चमा टियु क्रिकेट मैदानमा पपुवा न्युगिनीविरुद्ध ३.४ ओभरमा २१ रन खर्चेर ५ विकेट लिएका थिए । सन्दीपले २०२२ अगष्टमा केन्याविरुद्ध ४ ओभरमा ९ रन खर्चेर ५ विकेट लिएका थिए ।

ओडिआईमा नेपालका सन्दीप लामिछानेले पपुवा न्युगिनीविरुद्ध २०२१ अलमरेतमा ५.१ ओभरमा ११ रन खर्चेर ६ विकेट लिएका थिए । सन्दीपले नै २०२० मा अमेरिकाविरुद्ध ६ ओभरमा १ मेडनसहित १६ रन खर्चेर ६ विकेट लिएका थिए ।

कुशल भुर्तेलले लिष्ट ए मान्यता प्राप्त खेलमा दुई महिनाअघि एसिसी इमर्जिङ टिम्स एसिया कपमा युएई ए विरुद्ध १० ओभरमा ४० रन खर्चेर ६ विकेट लिएका थिए ।

टि२० आई इतिहासमा भने उत्कृष्ट प्रदर्शनको कीर्तिमान मलेसियाका तीव्र गतिका बलर स्याजरुल इद्रुको नाममा छ । उनले चीनविरुद्ध केहि महिना अघि मात्रै ४ ओभरमा १ मेडनसहित ८ रन खर्चेर ७ विकेट लिएका थिए ।

अभिनाशले छैटौं ओभरको तेस्रो बलमा फरिद शिउसलाई १० रनमा कुशल भुर्तेलबाट क्याच गराउँदै पहिलो विकेट लिएका थिए । अभिनाशले लगत्तै चौथो बलमा बदिउ इस्माल नजावानलाई शून्यमा एलबीडब्लू आउट गरे । अन्तिम बलमा अभिनाशले थोलाल मोहम्मद रियानलाई शून्यमा एलबीडब्लू आउट गरे ।

अभिनाशले अन्तिम ओभरमा पहिलो बलमा हसैन साधिनलाई योर्करमा बोल्ड गरे । दोस्रो बलमा मिनुभान मोहम्मदलाई पनि योर्करमै बोल्ड गरेका थिए । उनी फेरि ह्याट्रिक बलमा चुकेका थिए । चौथो बलमा नासिर अलीलाई एलबीडब्लू आउट गर्दै ६ विकेट पूरा गरेका थिए । अभिनाशले आफ्नो अन्तर्राष्ट्रिय कुनैपनि क्रिकेट खेलमा पहिलो पटक ६ विकेट लिन सफल भएका हुन् ।