एजेन्सी – बंगलादेशले आइसिसी विश्वकप २०२३ का अफगानिस्तानलाई ६ विकेटले हराउँदै सानदार विजयी सुरुवात गरेको छ । जितको लागि १ सय ५७ रनको सामान्य विजयी लक्ष्य पछ्याएको बंगलादेशले ३४.४ ओभरमा ६ विकेट गुमाउँदै पूरा गर्यो ।

बंगलादेशको जितमा नाज्मुल हसन शान्टोले ८३ बलमा ३ चौका र १ छक्कासहित सर्वाधिक ५९ रनमा नट आउट रहे । मेहेदी हसन मिराज ७३ बलमा ५ चौकासहित ५७ रनमा आउट भए ।

कप्तान सकिब अल हसन १४, ओपनर तान्जिद हसनलाई ५ र लिटन दासलाई १३ रनमा गुमाएको थियो । अफगानिस्तानका आजमतुल्लाह ओमरजाई, नविन उल हक र फजलहक फारुकीले १–१ विकेट लिए ।

त्यसअघि धर्मशालामा टस हारेर पहिला ब्याटिङको निम्तो पाएको अफगानिस्तान ३७.२ ओभरमा १ सय ५६ रनमा आउट भयो । अफगानिस्तानका ओपनर रहमानउल्लाह गुरबाजले ६२ बलमा ४ चौका र १ छक्कासहित सर्वाधिक ४७ रनको योगदान दिए । इब्राहिम जद्रान २२ र रहमात शाह १८ रनमा आउट भए ।

अफगानिस्तानले राम्रो सुरुवात गरेको थियो । पहिलो विकेटका लागि गुरबाज र जद्रानले ८.२ ओभरमा ४७ रनको साझेदारी गरेका थिए । सकिब अल हसनले रहमात शाहलाई आउट गर्दा अफगानिस्तान १५.१ ओभरमा ८३(२ को बलियो अवस्थामा थियो ।

मध्यक्रमका कुनैपनि ब्याटरले राम्रो गर्न सकेनन् । हश्मातुल्लाह शाहिदी १८, नाजिबुल्लाह जद्रान ५, मोहम्मद नावी ६, आजमतुल्लाह ओमरजाईले २२, राशिद खानले ९ र मुजिब उर रहमानले १ रन बनाए ।

बंगलादेशका मेहेदी हसन मिराजले ९ ओभरमा ३ मेडनसहित २५ रन खर्चेर ३ विकेट लिए । सकिब अल हसनले ८ ओभरमा ३० रन खर्चेर ३ विकेट लिए ।

शोरिफुल इस्लामले दुई, तस्किन अहमद र मुश्ताफिजुर रहमानले एक एक विकेट लिए । अफगानिस्तानले अव बुधबार दिल्लीमा भारतसँग खेल्नेछ । बंगलादेशले मंगलबार धर्मशालामा इंग्ल्यान्डसँग खेल्नेछ ।