काठमाडौं (हाम्रो खेलकुद) – शीर्षक्रमका ब्याटर देव खनाल नेपालबाट यू-१९ क्रिकेटमा दुई शतक हान्ने पहिलो नेपाली खेलाडी बनेका छन् । मलेसियामा जारी यू१९ प्रिमियर कपमा इरानविरुद्ध शतक हानेसँगै देवले उक्त कीर्तिमान बनाएका हुन् । देव ६० बलमा १२ चौका र ४ छक्कासहित १ सय रनमा आउट भएका छन् । उनी शतक हाने लगत्तै आउट भएका थिए ।

देवको यू१९ मा यो दोस्रो शतक हो । उनले गत फागुमा आइसिसी यू१९ विश्वकप एसिया क्षेत्र छनोटमा कुवेतविरुद्ध १ सय १७ बलमा ९ चौका र ३ छक्कासहित १ सय २५ रनको शतकीय इनिङ खेलेका थिए । उनकै उच्च प्रदर्शनमा नेपालले ८ वर्षपछि यू१९ विश्वकपमा स्थान बनाएको थियो ।

नेपालबाट यसअघि एकै उमेर समूहमा कुनैपनि खेलाडीले दुई शतक हानेका थिएनन् । रित गौतम दुई फरक उमेर समूहमा शतक हान्ने एक्लो खेलाडी हुन् । उनले यू१६ र यू१९ दुबैमा नेपालबाट शतक हानेका छन् ।

नेपालबाट यू१९ क्रिकेटमा शक्ति गौचन, कनिष्क चौलागाई, राजु रिजाल, रित गौतम, अर्जुन कुमाल र देव खनालले यू१९ मा शतक हानेका छन् ।

पूर्व कप्तान पारस खड्का सिनियर टोलीबाट सर्वाधिक पाँच शतक हान्ने खेलाडी हुन् । देवले नेपालबाट १० ओडिआई खेलमा २ अर्धशतकसहित कुल २ सय ५३ रन बनाएका छन् । देव नेपाली ब्याटिङको भविष्यको रुपमा हेरिदै आएका छन् ।

उनले २०२२ मा पपुवा न्युगिनीविरुद्ध पहिलो ओडिआई खेलमा टियु क्रिकेट मैदानमा सिनियर टोलीमा डेब्यू गरेका थिए । त्यसै सिरिजको दोस्रो खेलमा उनले ७२ रन बनाएका थिए । आइसिसी विश्वकप लिग २ मा घरेलु टोली अमेरिकाविरुद्ध पनि उनले अर्धशतक प्रहार गरेका थिए ।

गतवर्ष उनी केन्या भ्रमणपछि १० महिना नेपाली टोली बाहिर हुनु परेको थियो । नेपालले दुई महिना अघि श्रीलंकामा सम्पन्न एसिसी इमर्जिङ टिम्स एसिया कपको लागि देवलाई सिनियर टोलीमा मौका दिएको थियो ।

भारत ए सँग १५ र युएई ए सँग २४ रनमा आउट भएका थिए । देवले लुम्बिनी प्रदेशबाट घरेलु क्रिकेट खेल्दै उत्कृष्ट प्रदर्शन गर्दै आएका छन् । उनलाई नेपालको तेस्रो नम्बरको दीर्घकालिन ब्याटरको रुपमा समेत हेरिदै आएको छ ।