काठमाडौं (हाम्रो खेलकुद) – बहराइनले एसिसी यू१९ प्रिमियर कपमा नेपालविरुद्ध कछुवा गतिमा ब्याटिङ गरेको छ । मलेसियाको बायोमास ओभलमा टस जितेर पहिला ब्याटिङ रोजेको बहराइनले २१ ओभरमा ४ विकेट गुमाउँदै ३३ रन बनाएको छ ।

बहराइनका मोहम्मद बासिल अब्दुल हाकिम ४५ बलमा १ चौकासहित ९ रनमा क्रिजमा छन् । अभिनव २८ बलमा २ रनमा क्रिजमा छन् । नेपालका दीपेश कँडेलले ५ ओभरमा ४ मेडनसहित १ रन खर्चेर २ विकेट लिएका छन् । दुर्गेश गुप्ताले ४ ओभरमा १ मेडनसहित १० रन खर्चेर २ विकेट लिएका छन् ।

ओपनर तथा कप्तान ऋषभ रमेशलाई स्पिनर दीपेश कँडेलले ६ रनमा एलबीडब्लू आउट गरे । दीपेशले नै आयन ओबैद सैइदलाई ३ रनमा बोल्ड गरे । तीव्र गतिका बलर दुर्गेश गुप्ताले मोहम्मद आदिल नवाज शेर लाल खानलाई शून्यमा बोल्ड गरे । दुर्गेशले साई सार्थक वैद्दराजुलाई २ रनमा उत्तमथापा मगरबाट क्याच आउट गराए ।

नेपालले पहिलो खेलमा इरानमाथि २ सय ७४ रनको सानदार जित हात पारेको थियो । नेपालले अन्तिम खेल कार्तिक २ मा साउदी अरेवियासँग खेल्नेछ । प्रतियोगितामा शीर्ष तीन टोलीले पाकिस्तानमा आगामी डिसेम्बरमा हुने एसिया कप खेल्न पाउनेछन् ।

समूह ए मा नेपाल १ खेलमा २ अंकका साथ शीर्ष स्थानमा छ । समान खेलका साथ २ अंक नै भएपनि साउदी अरेविया दोस्रो स्थानमा छ । बहराइन र इरान भने जित विहीन हुँदै तेस्रो र चौथो स्थानमा छन् । नेपाल आजको खेलमा विजयी हुँदा सेमिफाइनल सम्भावना मजबुत बन्नेछ ।