एजेन्सी – भारतमा जारी विश्वकप क्रिकेटमा मंगलबार नेदरल्यान्ड्सले दक्षिण अफ्रिकालाई २ सय ४६ रनको लक्ष्य दिएको छ । वर्षाका कारण ४३ ओभरमा घटाइएको खेलमा नेदरल्यान्ड्सले ८ विकेट गुमाउँदै २ सय ४५ रन बनाएको छ ।

नेदरल्यान्ड्सका लागि कप्तान स्कट एडवार्ड्सले ६९ बलमा सर्वाधिक ७८ रनमा नटआउट रहे । उनले १० चौका र १ छक्का प्रहार गरेका हुन् । आर्यन दत्तले ९ बलमा २३ रन बनाउँदै नआउट रहे । उनले ३ छक्का प्रहार गरे ।

ओपनर विक्रमजित सिंह १६ बल खेल्दै मात्र २ रनमा आउट भए । अर्का ओपनर म्याक्स ओडाउडले २५ बलमा १८ रन जोड्ने क्रममा ४ चौका प्रहार गरे । कोलिन एकरम्यानले २५ बलमा एक चौका सहित १३ रन बनाए ।

बास डे लेडाले २ रन मात्र बनाउन सके। साइब्रान्ड अंगलब्रेक्तले १९ रन बनाउँदा लोगन भ्यान बिकले १० रन बनाए । रोलाफ भ्यान डर मर्वाले १९ बलमा २९ रन जोडे ।

दक्षिण अफ्रिकाका लागि लुंगी एनगिडी, मार्को यानसन र कागिसो रबाडाले समान २ विकेट लिए । यस्तै जेरार्ड कोटजी र केशव माहाराजले भने समान १ विकेट लिए ।

विश्वकपमा दक्षिण अफ्रिकाले यस अघिका खेलेका दुबै खेल जितेको थियो भने नेदरल्यान्ड्सले दुबै खेल गुमएको थियो ।