काठमाडौं (हाम्रो खेलकुद) – नेपालका बायाँ हाते स्पिनर दीपेश कँडेलले एसिसी यू१९ प्रिमियर कपमा लगातार दोस्रो खेलमा ६ विकेट लिएका छन् । मलेसियामा जारी प्रतियोगितामा साउदी अरेवियालाई ३ सय १ रनको फराकिलो अन्तरले हराउन दीपेशले सानदार बलिङ गरेका छन् ।

दीपेशले ९.१ ओभरमा १८ रन खर्चेर ६ विकेट लिएपछि जितको लागि ३ सय ४८ रनको विशाल विजयी लक्ष्य पछ्याएको साउदी अरेविया ४६ रनमा अल आउट भएको थियो ।

दीपेशले यसअघिको खेलमा बहराइनविरुद्ध ९.५ ओभरमा ८ मेडनसहित ४ रन खर्चेर ६ विकेट लिएका थिए । बहराइनविरुद्ध उनले ५९ मध्य ५७ बल डट राखेका थिए ।

पहिलो खेलमा इरानविरुद्ध उनले ७ ओभरमा ३ मेडनसहित ४ रन खर्चेर ३ विकेट लिएका थिए । जारी प्रतियोगितामा दीपेश सर्वाधिक विकेट लिने बलर हुन् । सानदार प्रदर्शन गर्दै आएका दीपेशले मात्रै ३ खेलमा १५ विकेट लिँदै सनसनी मच्चाएका छन् ।

गत फागुनमा नेपाललाई आइसिसी यू-१९ विश्वकप २०२४ मा पुर्याउन ह्याट्रिक लिँदै उनले अविश्वसनीय प्रदर्शन गरेका थिए । आइसिसी यू१९ विश्वकप एसिया क्षेत्र छनोटमा युएईलाई ७ रनले हराउन दीपेश नायक बनेका थिए ।

४८ औं ओभरको अन्तिम तीन बलमा लगातार विकेट लिँदै नेपालको विश्वकपमा स्थान पक्का गराएका थिए । दीपेशको ५ विकेटको सहयोगमा नेपालले ८ वर्षपछि विश्वकपमा स्थान बनाउन सफल भएको थियो ।

युएईलाई जितको लागि १८ बलमा ११ रन चाहिँदा दीपेशले बलिङ गर्न आएका थिए । युएईको हातमा ३ विकेट थियो । तर दीपेशले अन्तिम तीन बलमा लगातार विकेट लिँदै नेपाललाई विश्वकपमा पुर्याएका थिए । उक्त खेलमा दीपेशले १० ओभरमा १ मेडनसहित ३१ रन खर्चेर ५ विकेट लिएका थिए ।

प्रिमियर कपमा दीपेशको उच्च बलिङ प्रदर्शनको सहयोगमा नेपालले पहिलो खेलमा इरानलाई २ सय ७४ र दोस्रो खेलमा बहराइनलाई ७ विकेटले हराएको थियो ।

सेमिफाइनल कार्तिक ५ गते (अक्टोबर २२) मा हुनेछ । फाइनल र तेस्रो स्थानको लागि कार्तिक ७ ९अक्टोबर २४० मा प्रतिस्पर्धा हुनेछ । नेपालले सेमिफाइनलमा समूह डी को विजेतासँग खेल्नेछ । समूह डी मा जापाना, हङकङ र मलेसिया मध्य एक समूह विजेता बन्नेछन् ।