एजेन्सी – बंगलादेशले आइसिसी विश्वकप २०२३ मा घरेलु टोली भारतलाई २ सय ५७ रनको मध्यम लक्ष्य दिएको छ । पुणेमा टस जितेर पहिला ब्याटिङ रोजेको बंगलादेशले निर्धारित ५० ओभरमा ८ विकेट गुमाउँदै २ सय ५६ रन बनायो ।

बंगलादेशका ओपनर लिटन दासले ८२ बलमा ७ चौकासहित सर्वाधिक ६६ रन बनाए । अर्का ओपनर तानजिद हसन ४३ बलमा ५ चौका र ३ छक्कासहित ५१ रनमा आउट भए । बंगलादेशलाई ओपनर हसन र दासले १४.४ ओभरमा ९३ रन जोड्दै सानदार सुरुवात दिलाएका थिए ।

कुलदीप यादवले हसनलाई एलबीडब्लू आउट गरे । त्यसपछि बंगलादेशका ब्याटरले साझेदारी गर्न नसक्दा मध्यम योगफलमै रोकिएका हुन् ।

कप्तान नाज्मुल हसन शान्टो १७ बलमा ८ रन बनाउँदै रविन्द्र जडेजाको बलमा एलबीडब्लू आउट भए । मेहेदी हसन मिराज ३ रनमा क्याच आउट भए । लेग साइडमा सर्ट खेल्ने धुनमा राहुलले मिराजको क्याच उत्कृष्ट लिएका थिए ।

तौहिद हृदोय १६ रनमा आउट भए । मुश्फिकुर रहिम ४६ बलमा १ चौका र १ छक्कासहित ३८ रनमा आउट भए । महमुदूल्लाह रियाद ३६ बलमा ३ चौका र ३ छक्कासहित ४६ रनमा आउट भए । नासुम अहमदले १८ बलमा २ चौकासहित १४ रनमा आउट भए ।

भारतका रविन्द्र जडेजाले १० ओभरमा ३८ रन खर्चेर २ विकेट लिए । कुलदीप यादवले १० ओभरमा ४७ रन खर्चेर १ विकेट लिए । मोहम्मद शिराजले १० ओभरमा ६० रन खर्चेर २ विकेट लिए । जस्प्रित बुमराहले १० ओभरमा १ मेडनसहित ४१ रन खर्चेर २ विकेट लिए ।