काठमाडौं (हाम्रो खेलकुद) – नेपाली राष्ट्रिय क्रिकेट टोलीका अलराउन्डर विवेक यादव एक वर्षपछि प्लेइङ-११ मा परेका छन् ।

पछिल्लो समय चोटका कारण टोलीबाहिर रहेका विवेक यूएईविरुद्ध सोमबार हुने त्रिकोणात्मक टि२०आई खेलको अन्तिम लिग खेलका लागि टोलीमा परेका हुन् । उनले पछिल्लो पटक केन्यामा भएको टि२०आई सिरिजमा खेलेका थिए । त्यसयता उनी टोलीबाहिर नै थिए ।

विवेकले सन् २०२२ मा ओमानमा भएको सिरिजमा राष्ट्रिय टोलीबाट डेब्यु गरेका थिए । उनले विश्वकप छनोटमा पनि यूएईविरुद्ध भएको निर्णायक खेलमा खेलेका थिए । हालसम्म उनले ७ खेल खेल्दै कमजोर प्रदर्शन गरेका छन् ।

विवेकलाई प्रशिक्षक मोन्टी देशाईले टि२० विशेष खेलाडीको रुपमा नै प्रयोग गर्ने निर्णय लिएका थिए । उनले मध्यक्रममा ब्याटिङ गर्नुका साथै तीव्र गतिको बलिङ समेत गर्दै आएका छन् । उनी घरेलु क्रिकेटमा मधेश प्रदेशबाट खेल्ने गरेका छन् ।

यूएईविरुद्ध सोमबार हुने खेलमा विवेकसँगै अभिनाश पनि टोलीमा फर्केका छन् । उनलाई हङकङविरुद्ध शनिबार भएको खेलमा विश्राम दिइएको थियो ।

नेपालको टोली :

आसिफ शेख, कुशल भुर्तेल, कुशल मल्ल, रोहित पौडेल, दीपेन्द्रसिंह ऐरी, सन्दीप जोरा, विवेक यादव, सोमपाल कामी, गुलशन झा, करण केसी, अभिनाश बोहोरा

यूएईको टोली :

मुहमद वसीम, वृत्य अरविन्द, खालिद शाह, आलिशान सराफु, आसिफ खान, बसिल हमिद, नसिर अली, निलांश केश्वनी, जहुर खान, मुहमद जवादुल्लाह, अकिफ राजा