काठमाडौं (हाम्रो खेलकुद) – नेपाली राष्ट्रिय यू-१९ टोलीका कप्तान देव खनालले एसीसी यू-१९ प्रिमियर कपको फाइनलमा यूएईविरुद्ध आक्रामक शतक प्रहार गरेका छन् ।

देवले यूएईविरुद्ध ३५ औं ओभरमा शतक पूरा गरे । शतक पूरा गरेको अर्को ओभरमा उनी क्याच आउट भएका थिए । देवले ९१ बलमा ९ चौका र ३ छक्काको मदतले १ सय रन जोडे ।

नेपालले ३६ ओभरको समाप्तिमा ४ विकेट गुमाएर १ सय ८४ रन जोडेको छ । क्रिजमा विकेटकिपर उत्तम २८ बलमा १४ रन बनाएर खेलिरहेका छन् । उनलाई दीपक डुम्रेले साथ दिनेछन् ।

त्यसअघि देव र ओपनर अर्जुन कुमालले तेस्रो विकेटका लागि १ सय २५ रनको साझेदारी गरेका थिए । अर्धशतक बनाएका अर्जुन २६ औं ओभरको चौथो बलमा स्टम्प आउट भए । उनले ७७ बलमा ४ चौकाको मदतले ५५ रन जोडे ।

ओपनर दीपक बोहोरा तेस्रो ओभरमा ५ रन जोड्दै क्याच आउट भएका थिए । लगत्तै चौथो ओभरको अन्तिम बलमा आकाश त्रिपाठी खाता नखोली पेभेलियन फर्केपछि नेपाल १४-२ को स्थितिमा रहेको थियो ।

आजको खेलमा नेपालले अलराउन्डर मिलन बोहराको स्थानमा विकेटकिपर उत्तम थापामगरलाई मौका दिएको छ । उत्तम मध्यक्रममा स्पिन राम्रो खेल्ने गर्दछन् । त्यसैको कारण आज उनलाई मौका दिएको छ । नेपालले सेमिफाइनला जापानसँगको खेलबाट एक बाहेक अन्य परिवर्तन गरेको छैन ।

नेपालले सेमिफाइनल खेलमा जापानलाई डकवर्थ लेविस पद्धतिको आधारमा १ सय ४३ रन तथा युएईले दोस्रो सेमिफाइनल खेलमा सिंगापुरलाई डवकर्थ लेविस पद्धतिको आधारमा १० विकेटले हराउँदै फाइनलमा स्थान बनाएका हुन् ।

नेपालले गत फागनुमा आइसिसी यू१९ विश्वकप एसिया क्षेत्र छनोटमा युएइृलाई ७ रनले हराउँदै २०२४ को विश्वकपमा स्थान बनाएको थियो । नेपाल पुन युएईलाई हराउदै उपाधि जित्न चाहन्छ । युएई त्यसको बदला लिन खोज्नेछ । दुबै टोलीमा विश्वकप एसिष क्षेत्र छनोट खेल्दाका खेलाडी छन् ।

नेपालले समूह चरणमा इरानलाई २ सय ७४, बहराइनलाई ७ विकेट र साउदी अरेवियालाई ३ सय २ रनले हराएको थियो । उता युएईले समूह चरणमा चीनलाई ९ विकेट, ओमानलाई ३ विकेट, कतारलाई १० विकेटले हराएको थियो ।

नेपालको प्लेइङ ११ : दीपक बोहरा, अर्जुन कुमाल, आकाश त्रिपाठी, देव खनाल (कप्तान), दीपक प्रसाद डुम्रे, आकाश चन्द, दीपेक कँडेल, विशाल विक्रम केसी, सुवास भण्डारी, उत्तम थापामगर र हेमन्त धामी ।