काठमाडौं (हाम्रो खेलकुद) – नेपालमा जारी त्रिकोणात्मक टि२०आई सिरिजको उपाधिका लागि नेपालले फाइनलमा युएई विरुद्ध खेल्ने भएको छ ।

आज भएको राउण्ड रोबिनको अन्तिम खेलमा हङकङसँग पराजित भएपनि नेट रनरेटका आधारमा युएई फाइनल प्रवेश गरेको हो । दुवै टोलीको समान २ अंक रहेको थियो । नेपाल यसअघि नै सबै चार खेल जित्दै ८ अंकका साथ फाइनल पुगिसकेको थियो ।

जितका लागि २० ओभरमा २ सय १३ रनको विशाल लक्ष्य पछ्याएको युएईलाई हारेपनि नेट रनरेटमा अगाडि रहन १ सय ३४ रन बनाउनु पर्ने थियो । अन्त्यमा युएईले २० ओभरमा ५ विकेटका क्षतिमा १ सय ४३ रन बनायो ।

बसिल अहमदले ३७ बलमा ३ चौका सहित ३० रन बनाउँदै नटआउट रहे। अर्का तिर निलंश केशवानीले २६ बलमा ३ चौका सहित ३१ रन जोडे ।

युएईका लागि खालिद शाहले २५ बलमा १ चौका र ३ छक्का सहित सर्वाधिक ३५ रन बनाए । यस्तै आलिशान शराफुले २१ बलमा ५ चौका सहित ३० रन, ओपनर तथा कप्तान मुहम्मद वासिमले १ र वृत्य अरविन्दले ७ रन बनाउँदा आशिफ खानले खाता खोल्न सकेनन् ।

हङकङका लागि एहसान खान, आयुष शुक्ला, नसरुल्ला राना र यासिम मुर्ताजाले समान एक-एक विकट लिए ।

यसअघि मुलपानीमा टस जितेर ब्याटिङ रोजेको हङकङले निर्धारित २० ओभरमा ३ विकेटका क्षतिमा २ सय १२ रनको विशाल योगफल खडा गरेको थियो ।

हङकङका लागि ओपनर मार्टिन कोटजिले ५५ बलमा १० चौका र ४ छक्का सहित ८६ रन बनाए । अर्का ओपनर तथा कप्तान निजाकत खान ९ रन बनाएर आउट भएका थिए । अंशुमन रथले ३५ बलमा २ चौका र १ छक्का सहित ४१ रन बनाए ।

बाबर हयातले २० बलमा ५ चौका र ५ छक्का सहित ६० रनको विस्फोटक पारी खेल्दै नटआउट रहे । यासिम मुर्तजाले अर्का तिर ३ रन बनाए ।

युएईका लागि निलंश केशवानी, संचित शर्मा र अकिफ राजाले समान एक-एक विकट लिएका थिए ।

फाइनल खेल शुक्रबार कीर्तिपूरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा हुनेछ।