काठमाडौं (हाम्रो खेलकुद) – नेपालका बायाँ हाते स्पिनर ललित नारायण राजवंशीले त्रिकोणात्मक टि२० आई सिरिजको फाइनल खेल युएईसँग खेल्ने भएका छन् । टियु क्रिकेट मैदानमा भएको टस हारेर नेपालले पहिला ब्याटिङ गर्दैछ ।

नेपालले आजको खेलमा एक परिवर्तन गरेको छ। अलराउन्डर विवेक यादवको स्थानमा स्पिनर ललितनारायण राजवंशीलाई खेलाउने निर्णय लिएको छ । ललितको युएईविरुद्ध पछिल्लो समय प्रदर्शन राम्रो छ । सन्दीप लामिछाने नहुँदा ललित प्रमुख स्पिनर हुन् ।

ललित अघिल्लो महिना अभ्यासको क्रममा घाइते भएका थिए । उनले हङकङविरुद्ध खेल्दै २ विकेट लिएका थिए । त्रिकोणात्मक सिरिजमा नेपालले ललितलाई एक खेलमा मात्रै मौका दिएको थियो ।

नेपालले लिगमा युएईलाई ७ विकेट र ५ विकेटले हराएको थियो । नेपालले हङकङलाई पनि दुबै खेलमा ६ विकेट र ७९ रनले हराएको थियो । उता युएई अन्तिम खेलमा हङकङसँग ६९ रनले पराजित भएपनि नेटरनरेटको फाइनल खेलेको हो । दुबै टोलीको समान २ अंक थियो । उच्च लयमा रहेको घरेलु टोली नेपाल युएईमाथि ह्याट्रिक जितका साथ अपराजित रहँदै उपाधि जित्न चाहन्छ । युएई नेपाललाई फाइनलमा हराउने सोचमा हुनेछ ।

नेपालको प्लेइङ ११ :

कुशल भुर्तेल, आसिफ शेख (विकेटकिपर), कुशल मल्ल, रोहित पौडेल (कप्तान), दीपेन्द्रसिंह ऐरी, सन्दीप जोरा, गुलशन झा, सोमपाल कामी, करण केसी, अभिनाश बोहरा र ललित नारायण राजवंशी ।