काठमाडौं (हाम्रो खेलकुद) – नेपालले त्रिकोणात्मक टि२० आई सिरिजको फाइनल खेलमा युएईका ओपनर मोहम्मद वासिमलाई दुई जीवनदान दिएको छ । जितको लागि १ सय ६३ रनको विजयी लक्ष्य पछ्याएको युएईले ५ ओभरमा ६० रन बनाएको छ ।

मोहम्मद वासिम १७ बलमा ६ चौका र २ छक्कासहित ३८ रनमा क्रिजमा छन् । अर्यांश शर्मा १४ बलमा २ चौकासहित १६ रनमा खेलेका छन् ।

वासिमले दुई महत्वपूर्ण जीवनदान पाएका छन् । करण केसीको तेस्रो ओभरको चौथो बलमा प्वाइन्टमा कुशल मल्लले मोहम्मद वासिमको ब्यक्तिगत २३ रनमा क्याच छाड्न पुगेका थिए । ललितको चौथो ओभरको पाँचौं बलमा पुनः ३४ रनमा वासिमले दुई जीवनदान पाएका थिए । ललित कट एण्ड बोल्ड आउट गर्न चुकेका थिए ।

युएईले पहिलो ओभरमा १७ रन जोड्दै ड्रिम सुरुवात गरेको थियो । तीव्र गतिका बलर सोमपाल कामीले पहिलो बल गर्नेक्रममा खुट्टाले स्टम्प लागेपछि नो बल भएको थियो । त्यसपछि मोहम्मद वासिमले छक्का र दुई लगातार चौका हान्दै राम्रो सुरुवात दिलाएका थिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको नेपालले निर्धारित २० ओभरमा ८ विकेट गुमाउँदै १ सय ६२ रन बनाएको थियो । नेपालका ओपनर कुशल भुर्तेल २९ बलमा ६ चौका र ३ छक्कासहित सर्वाधिक ५० रनको योगदान दिए ।

सुरुवाती १० ओभरमा नेपालले ९५ रन बनाउँदा ३ विकेट गुमाएको थियो । अन्तिम १० ओभरमा ६७ रन बनाउँदा पाँच विकेट गुमाएको थियो ।

युएईका आयन खानले ४ ओभरमा १६ रन खर्चेर ३ विकेट लिए । अली नासिरले ४ ओभरमा ३६ रन खर्चेर २ विकेट लिए । जहुर खानले ४ ओभरमा २६ रन खर्चेर २ विकेट लिए ।