काठमाडौं (हाम्रो खेलकुद) – नेपालले आफ्नो क्रिकेट इतिहासमा एक पटक मात्रै विश्वकप खेलेको छ । नेपालले सन् २०१४ मा बंगलादेशमा टि२० विश्वकप पहिलो पटक खेलेको थियो । त्यसपछि नेपाल ग्लोबल र एसिया क्षेत्र छनोटबाटै बाहिरिदै आएकोछ । नेपाललाई पुन टि२० विश्वकप खेल्ने स्वर्णिम अवसर छ ।

आइसिसी टि२० विश्वकप एसिया क्षेत्र छनोट फाइनल सोमबार देखी नेपालमा सुरु हुँदैछ । टियु र मुलपानीमा हुने प्रतियोगितामा सेमिफाइनल हुँदै फाइनलमा पुग्ने दुई टोली २०२४ मा हुने टि२० विश्वकप खेल्नेछन् ।

नेपाल, मलेसिया, सिंगापुर र ओमान समूह ए मा छन् । समूह बी मा हङकङ, कुवेत, युएई र बहराइन छन् । समूह ए का टियु र समूह बी का मुलपानी खेलहरु हुनेछन् ।

नेपाल टि२० विश्वकप एसिया क्षेत्र खेल्ने सबैभन्दा माथिल्लो वरियता टोली हो । नेपाल टि२० आई वरियतामा १६ औं, युएई १७ औं र ओमान २० औं स्थानमा छन् ।

नेपालले पछिल्लो समय अन्तर्राष्ट्रिय क्रिकेटमा सानदार प्रदर्शन गर्दै आएको छ । भारतसहित टेस्ट टोलीविरुद्ध सानदार प्रदर्शन गरेको नेपालको मनोबल उच्च छ । विश्वकप छनोटमा नेपाल उपाधिको प्रमुख दाबेदार टोली हो । नेपालले विश्वकपमा स्थान बनाउने उच्च सम्भावना छ । नेपालले विश्वकप खेल्ने पाँच बलिया आधार यस प्रकार छन् ।

५. सन्तुलित बलिङ आक्रामण

टि२० क्रिकेटमा उत्कृष्ट बलिङ विना जित हात पार्न कठिन पर्दछ । नेपालको टोलीमा सन्तुलित बलिङ आक्रामण छ । तीव्र गतिका बलरमा सोमपाल कामी र करण केसी हुनेछन् । पावर प्लेमा दुबैले राम्रो प्रदर्शन गर्दै आएका छन् ।

दुबै बलरमा एक दशक अनुभव छ । मध्यक्रममा स्पिनर सन्दीप लामिछाने र ललित नारायण राजवंशी हुनेछन् । सन्दीप र ललितको स्पिन आक्रामण सामना गर्न सहज कुनैपनि ब्याटरलाई हुँदैन । मध्यक्रममा नेपालले तीव्र गतिका बलरमा गुलशन झा र स्पिनर दीपेन्द्रसिंह ऐरीलाई प्रयोग गर्नेछ ।

डेथ ओभरमा अभिनाश बोहरा हुनेछन् । नेपालसँग चार तीव्र गतिका बलर छन् । दीपेन्द्रसहित तीन प्रमुख स्पिनर छन् । पार्टटाइममा कुशल मल्ल, रोहित र कुशल भुर्तेल हुनेछन् । नेपालसँग बलिङमा ८ विकल्प हुनेछन् ।

चार तीव्र गतिका बलर र चार स्पिनर छन् । रोहित र कुशल भुर्तेललाई जोड्दा १० विकल्प हुनेछन् । कुनै बलरले खराब प्रदर्शन गर्दा नेपालसँग धेरै विकल्प हुनेछ । पछिल्लो पटक सोमपाल र करण नहुँदा नेपालको बलिङ केहि कमजोर बनेको थियो ।

करण, दीपेन्द्र, सोमपाल, कुशल मल्ल र गुलशन झा जस्ता अलराउन्डरले नेपालको टोली अतिरिक्त बलियो बनाएको छ । टोलीमा अलराउन्डर बढी हुँदा बलिङमा धेरै विकल्प छन् ।

४. ब्याटिङमा गहिराई हुनु

कहिले काहिँ खराब सुरुवात हुनसक्छ । यो अवस्थामा खेलमा फर्किने नेपालको ब्याटिङ लाइनप छ । ओपनरमा आसिफ शेख र कुशल भुर्तेल हुनेछन् । तेस्रो नम्बरमा कुशल मल्ल हुनेछन् । चौथो नम्बरमा कप्तान रोहित पौडेल र पाँचौं नम्बरमा दीपेन्द्रसिंह ऐरी छन् । दीपेन्द्रको लयले नेपाललाई अतिरिक्त फाइदा मिल्नेछ ।

नेपालका तीन तीव्र गतिका बलर सोमपाल कामी, करण केसी र गुलशन झा राम्रो ब्याटिङको क्षमता राख्छन् । त्यसैको कारण नेपालको ब्याटिङमा गहिराई छ । नेपालको प्लेइङ-११ मा ललित नारायण राजवंशी र अभिनाश बोहरा बाहेक अन्य सबै ब्याटरले राम्रो ब्याटिङको क्षमता राख्छन् ।

सन्दीपले पनि राम्रो ब्याटिङ गर्दै आएका छन् । नेपालको ब्याटिङक्रम नौं नम्बर सम्म छ । त्यसैको कारण नेपालले राम्रो योगफल बनाउन सक्छ । राम्रो सुरुवात गर्दा विष्फोटक अन्त्य गर्न सक्छ ।

३. एकै टोली लगातार खेल्नु

गत फागुन देखी मुख्य प्रशिक्षक मोन्टी देशाई र कप्तान रोहित पौडेलले टोलीमा एकै टोली खेलाउँदै आएका छन् । फागुन यता टोलीमा अभिनाश बोहरा मात्रै टोलीमा थपिएका छन् । अभिनाशले पनि त्रिकोणात्मक टि२० आई सिरिजमा टोलीसँग खेली सकेका छन् ।

टोलीमा एक अर्का खेलाडीको बारे सबैलाई जानकार छ । एक अर्का खेलाडी प्रति विश्वास पनि छ । सबै खेलाडीलाई एक अर्काको खेल थाहा हुँदा थप खुलेर खेल्न सक्छन् । यसअघिका विश्वकप छनोटमा नेपालले लगातार खेलाडी परिवर्तन गर्ने गर्दथ्यो । जसले गर्दा खेलाडीहरुमा तालमेलको कमी हुन्थ्यो ।

खेलाडीमा म्याच अभाव पनि छैन । सबै खेलाडीले राम्रो म्याच पाएका छन् । फागुन यता नेपालले ३० भन्दा बढी खेल अन्तर्राष्ट्रिय खेल खेलेको छ । त्यसैको कारण खेलाडीमा आफ्नो गल्ती के कस्तो अन्यौल छैन । लगातार एकै टोली आउँदा सबै खेलाडीको भूमिका स्पष्ट छ । त्यसैले गर्दा खेलाडीमा कुनैपनि दुविधा छैन । नेपाली खेलाडीले आफ्नो उत्कृष्ट खेल देखाउन सक्छन् ।

२. उच्च मनोबल

क्रिकेटमा मनोबल सधैं महत्वपूर्ण हुन्छ । पछिल्लो एक वर्षमा नेपाली टोलीको मनोबल उच्चछ । मुख्य प्रशिक्षक मोन्टी देशाई आएपछि नेपालले घरेलु मैदानमा १७ मध्य १६ खेलमा जित हात पारेको छ । नेपालले पछिल्लो समय भारतसँग एसिया कप र १९ औं एसियाली खेलकुद दुबैमा सानदार प्रदर्शन गरेको थियो ।

नेपालले पछिल्लो समय भारत, पाकिस्तान, जिम्बावे र वेस्टइन्डिज जस्ता टेस्ट टोलीसँग खेलेको छ । सबै टोलीविरुद्ध नेपालले राम्रो प्रभाव छाडेको थियो । ठूला टोलीविरुद्ध सानदार प्रदर्शन गरेको हुँदा नेपालको मनोबल उच्च छ ।

यसअघिको छनोटमा नेपाली खेलाडीको मनोबल अन्यौल देखिन्थ्यो । किनभने आफू भन्दा ठूला टोलीविरुद्ध खेल्ने अवसर पाउने थिएन । अन्तर्राष्ट्रिय स्तरमा नेपालले कमजोर ब्याटिङका कारण लगातार हारेको हुन्थ्यो । तर यस पटक नेपालले लगातार जितेको पनि छ । मोन्टीको आगमनसँगै सबै खेलाडी र टोलीको मनोबल उच्च छ । त्यहिँ उच्च मनोबलका कारण नेपालले थप उत्कृष्ट क्रिकेट खेल्ने देखिन्छ ।

१. घरेलु मैदान र दर्शक

घरेलु मैदानमा कुनैपनि टोली अतिरिक्त मजबुत हुन्छ । त्यसको मुख्य कारण घरेलु मैदान, दर्शक र कन्डिसन हो । नेपाली खेलाडी आफ्नो घरेलु मैदानको भरपूर्ण फाइदा उठाउँदै विश्वकपमा स्थान बनाउने सम्भावना देखिन्छ । नेपालले घरेलु मैदानमा पछिल्ला २० खेलमा १८ मा जित र २ मा मात्रै हार व्यहोरेको छ ।

सबै खेलाडीलाई टियु र मुलमानी मैदानको बारे राम्रोसँग जानकारी छ । अर्कोतर्फ नेपाली दर्शकको पनि त्यतिनै राम्रो साथ पाउनेछ । नेपाली हजारौं दर्शक सामु खेल्न विपक्षी कुनैपनि टोलीलाई सहज हुनेछैन ।

घरेलु मैदानमा नेपालले एसोसिएटका सबै प्रमुख टोलीलाई हराउँदै आएको छ । यसअघि नेपालले विदेशी भूमिमा खेल्दा कन्डिसन बुझ्न कठिन पर्ने गर्दथ्यो । नेपाली दर्शकलाई पनि मिस गर्दै आएको थियो ।

नेपालमा जस्तो दर्शक अन्य एसोसिएट टोलीमा हुँदैन । अन्य अधिकाम्स टोलीलाई दर्शक सामु खेल्ने बानी छैन । दर्शकको कारण विपक्षी टोली थप दबाबमा पर्ने देखिन्छ । त्यसैले घरेलु मैदान र दर्शकको हौसलाले गर्दा नेपालले विश्वकपमा स्थान बनाउन सक्छ ।