एजेन्सी – नामिबियाले पाँचौं तथा अन्तिम टि२० आई खेलमा टेस्ट टोली जिम्बावेलाई ८ रनले हराएको छ । योसँगै पाँच टि२० आई खेलको सिरिज नामिबियाले ३-२ ले जितेको छ ।

जितको लागि १ सय २ रनको सामान्य विजयी लक्ष्य पछ्याएको जिम्बावे १९.२ ओभरमा ९३ रनमा अल आउट भयो । जिम्बावेका ल्यूक जोंगवेले १६ बलमा ३ चौकासहित सर्वाधिक २४ रन बनाए । सिकन्दर राजा २, रयान बर्ल १९, क्वलाइभ माडान्डे १६ र निक वेल्च २३ रनमा आउट भए । अन्य कुनैपनि जिम्बावेका खेलाडीले राम्रो प्रदर्शन गर्न सकेनन् ।

नामिबियाको जितमा तीव्र गतिका बलर जेजे स्मितले ४ ओभरमा १४ रन खर्चेर ३ विकेट लिए । स्पिनर बेनार्ड स्कोल्टजले ४ ओभरमा ११ रन खर्चेर ३ विकेट लिए । कप्तान जेरार्ड इरास्मसले ४ ओभरमा १३ रन खर्चेर १ विकेट लिए ।

त्यसअघि विन्डहोकमा टस हारेर पहिला ब्याटिङको निम्तो पाएको नामिबिया १८.४ ओभरमा १ सय १ रनमा अल आउट भएको थियो । त्यो योगफल नै जितको लागि पर्याप्त बन्यो ।

नामिबियाका जेजे स्मितले २८ बलमा १ चौका र २ छक्कासहित सर्वाधिक २९ रन बनाएका थिए । निकोलस डेविन १९ र जेन फ्रेलिंकले समान १९ रन बनाए । अन्य कुनैपनि ब्याटरले राम्रो प्रदर्शन गर्न सकेनन् ।

जिम्बावेका सिकन्दर राजाले ४ ओभरमा २४ रन खचेर ४ विकेट लिएपनि टोलीले जित्न सकेन । टेन्डाई चटाराले ३.४ ओभरमा ७ रन खर्चेर ३ विकेट लिए । रिचर्ड न्गरावले ३ ओभरमा १ मेडनसहित ६ रन खर्चेर २ विकेट लिए ।

यसअघि नामिबिया पहिलो र चौथो खेलमा समान ७ विकेटले विजयी भएको थियो । जिम्बावेले दोस्रो खेल ५ विकेट र दोस्रो खेल ६ विकेटले हारेको थियो ।

नामिबियाले आइसिसी टि२० विश्वकप अफ्रिका छनोट क्षेत्र अघि जिम्बावेसँग सिरिज खेलेको हो । अफ्रिका छनोट नोभेम्बर २० देखी ३० सम्म हुनेछ । प्रतियोगितामा आयोजक नामिबियासँगै केन्या, नाइजेरिया, रवान्डा, तान्जनिया, युगान्डा र जिम्बावे छन् । शीर्ष दुई टोलीले २०२४ अमेरिका र वेस्टइन्डिजमा हुने टि२० विश्वकप खेल्न पाउनेछन् ।