काठमाडौं (हाम्रो खेलकुद) – नेपालमा जारी आइसिसी टि२० विश्वकप एसिया क्षेत्र फाइनल छनोटमा समूह बी को सेमिफाइनल समिकरण निकै रोचक बनेको छ । मंगलबार बहराइनले हङकङलाई हराएपछि सबै टोलीको सेमिफाइनल सम्भावना कायमै रहेको थियो ।

समूह ए बाट भने नेपाल र ओमानले सेमिफाइनलमा स्थान पक्का गराएका छन् । बिहीबार खेलले समूह ए को विजेता र उपविजेता निर्धारण गर्नेछ ।

उता बिहीबार मुलपानीमा जारी समूह बी का अन्तिम दुई खेलले सेमिफाइनल समिकरण निर्धारण गर्नेछ । सबै टोलीको सेमिफाइनल समिकरण यस प्रकार छ ।

युएई –

युएईको सेमिफाइनल यात्रा औपचारिकता बाँकी देखिन्छ । युएई २ खेलमा ४ अंकका साथ शीर्ष स्थानमा छ । युएईले बिहीबार हङकङलाई हराए अपराजित रहँदै सेमिफाइनलमा पुग्नेछ ।

हङकङसँग झिनो अन्तरले हार्दा पनि नेटरनरेटको कारण सेमिफाइनलमा पुग्ने देखिन्छ । युएईको नेटरनरेट १.४९६ छ। हङकङसँग फराकिलो अन्तरले हारेको खण्डमा भने उता अंक विहीन कुवेतले बहराइनलाई हराउनुपर्छ । अथवा बहराइनको जितको अन्तर निकै सानो हुनुपर्छ ।

हङकङ –

बहराइनलाई पराजित गरेको भए समूह बी बाट युएईसँगै एक खेल अगावै हङकङ सेमिफाइनलमा पुग्ने थियो । तर अव हङकङले सेमिफाइनल खेल्न बिहीबार युएईलाई हराउनुपर्छ । हराएर मात्रै हुँदैन । नेटरनरेटमा पनि ध्यान दिनुपर्छ ।

अर्को खेलमा कुवेतले हारेको खण्डमा भने बहराइनसँगको नेटरनरेटमा भरपर्नेछ । त्यसैले अर्को खेलमा कुवेतले जितेको खण्डमा हङकङलाई नेटरनरेटको कुनै झन्झट हुनेछैन ।

हङकङ पराजित भएपनि सेमिफाइनलमा पुग्नसक्छ । तर युएईसँग हारको अन्तर झिनो हुनुपर्छ । अर्को खेलमा कुवेतले बहराइनलाई फराकिलो अन्तरले हराउनुपर्छ ।

कुवेतको नेटरनरेट माइनस १.६२३, बहराइनको ०.१६४ र माइनस ०.१०० छ । हङकङले जित निकालेको खण्डमा सेमिफाइनल यात्रा सहज बन्ने देखिन्छ । हङकङ २ खेलमा २ अंकका साथ तेस्रो स्थानमा छ ।

बहराइन :

बहराइन २ खेलमा २ अंकका साथ दोस्रो स्थानमा छ । बिहीबार बहराइनले कुवेतमाथि सानदार जित हात पारेको खण्डमा सेमिफाइनलमा स्थान बनाउनेछ । पहिलो खेलमा युएई विजयी भएमा बहराइनलाई नेटरनरेटको कुनै झन्झट हुनेछैन ।

तर पहिलो खेलमा हङकङ विजयी भएमा बहराइनलाई नेटरनरेटको दबाब पनि हुनेछ । बहराइनको खेल दोस्रो हुँदा नेटरनरेट गणना गरेर खेल्नेछ । तर बहराइन पराजित भएको खण्डमा भने अन्य टोलीको नतिजाबाट साथ लिनुपर्छ ।

बहराइन पराजित हुँदा हङकङले पनि पहिलो खेल फराकिलो अन्तरले हार्नुपर्छ । साथै बहराइनको हारको अन्तर पनि झिनो हुनुपर्छ ।

कुवेत :

कुवेत २ खेलमा जित विहीन हुँदै पुछाारमा छ । कुवेत सेमिफाइनल खेल्न पहिला हङकङले हार्नुपर्छ । हङकङले जितेको खण्डमा भने बहराइनसँग खेल्नु अघिनै कुवेत सेमिफाइनल दौडबाट बाहिरिनेछ ।

यदि हङकङले हारेको खण्डमा र बहराइनमाथि विशाल जित हात पार्न सके कुवेतले सबैलाई सरप्राइज दिँदै सेमिफाइनलमा स्थान बनाउन सक्छ । कुवेतको नेटरनरेट माइनसमा हुँदा विशाल जित बाहेक अन्य कुनै विकल्प बाँकी छैन ।