काठमाडौं (हाम्रो खेलकुद) – बहराइन आइसिसी टि२० विश्वकप एसिया क्षेत्र फाइनल छनोटमा कुवेतसँग ४ विकेटले पराजित भएपनि सेमिफाइनलमा पुगेको छ । हङकङलाई झिनो नेटरनरेटले पछि पार्दै बहराइनले सेमिफाइनलमा स्थान बनाएको हो ।

बहराइन, हङकङ र कुवेतको समान २ अंक थियो । तर बहराइनको नेटरनरेट माइनस ०.३९८, हङकङको माइनस ०.४३३ र कुवेतको माइनस ०.६४९ रह्यो । जितको लागि १ सय ५९ रनको विजयी लक्ष्य पछ्याएको कुवेतले १६.३ ओभरमा ६ विकेट गुमाउँदै पूरा गर्यो ।

कुवेतको जितमा उस्मान पटेलले ३४ बलमा ६ चौका र ५ छक्कासहित सर्वाधिक ६४ रनको योगदान दिए । कप्तान मोहम्मद अस्लाम २० बलमा ५ चौका र १ छक्कासहित ३६ रनमा नट आउट रहे । बहराइनका अली दाउद र रिजवान बटले समान दुई विकेट लिए ।

त्यसपछि माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको बहराइनले २० ओभरमा ९ विकेट गुमाउँदै १ सय ५८ रन बनाएको थियो । बहराइनका इमरान अनवारले २५ बलमा २ चौका र ३ छक्कासहित सर्वाधिक ३७ रन बनाएका थिए । कुवेतका मिरज अहमद र शिराज खानले एक एक विकेट लिए ।

समूह ए मा ओमान ३ खेलमा ६ अंकका साथ शीर्ष स्थानमा रह्यो । नेपाल ३ खेलमा २ मा जित र १ मा हारसहित ४ अंकका साथ दोस्रो स्थानमा रह्यो । समूह बी मा युएई ३ खेलमा अपराजित रहँदै ६ अंकका साथ शीर्षस्थानमा रह्यो । बहराइन ३ खेलमा २ अंकका साथ दोस्रो स्थानमा रह्यो ।

पहिलो सेमिफाइनल खेलमा शुक्रबार नेपाल र युएईबीच मुलपानी मैदानमा खेल हुनेछ । अर्को सेमिफाइनलमा शुक्रबार नै टियुमा ओमान र बहराइनबीच हुनेछ ।

विजेता दुबै टोली २०२४ को विश्वकप खेल्न पाउनेछन् । फाइनल आइतबार हुनेछ । सेमिफाइनल र फाइनल दुबै खेल बिहान ११ बजे सुरु हुनेछ ।