काठमाडौं (हाम्रो खेलकुद) – नेपालले टि२० आईमा पहिलो पटक सुपर ओभर खेलेको छ । आइसिसी टि२० विश्वकप एसिया छनोटको फाइनलमा ओमानसँग सुपर ओभरमा पराजित भएको हो । यो नेपालले टि२० आईमा खेलेको पहिलो सुपर ओभर समेत हो ।

जितको लागि १ सय ८५ रनको विजयी लक्ष्य पछ्याएको ओमानले निर्धारित २० ओभरमा ९ विकेट गुमाउँदै १ सय ८४ रन बनाएको थियो । ओमानलाई जितको लागि अन्तिम ६ बलमा ८ रन चाहिँदा सन्दीप लामिछानेले ७ रन खर्चेर एक रन आउटसहित कुल तीन विकेट लिएपछि सुपर ओभर भएको थियो ।

अभिनाश बोहरालाई नसिम खुसीले सुपर ओभरमा तीन छक्कासहित कुल २१ हानेका थिए । सुपर ओभर जित्नको लागि नेपाललाई २२ रन चाहिँएको थियो । तर बिलाल खानले मात्रै १० रन खर्चेर जित दिलाएका थिए ।

सन् २००९ मा एसियन क्रिकेट काउन्सिल टि२० कपमा नेपाल र कुवेतबीचको खेल पनि टाई भएको थियो । जितको लागि १ सय २४ रनको विजयी लक्ष्य पछ्याएको नेपालले २० ओभरमा ७ विकेट गुमाउँदै १ सय २३ रन बनाएको थियो । तर त्यो समय सुपर ओभर नभएर बल आउटमा नेपालले जितेको थियो ।

बल आउटमा नेपालले ३२ ले जितेको थियो । कुवेतविरुद्ध डेब्यू खेल खेलेका विनोद भण्डारीले अन्तिम बलमा छक्का हान्दै खेल टाई गराएका थिए । त्यो खेल टि२० आई नभएर टि२० थियो ।

सुपर ओभरमा बल आउट अर्थात स्टम्प ताक्नेबाट नेपाल विजयी भएको थियो । त्यो समय नेपालका पारस खड्का, दीपेन्द्र चौधरी र शक्ति गौचनले स्टम्प ताकेका थिए । विनोद दास र सन्जम रेग्मी चुकेका थिए ।

आइसिसी विश्वकप लिग–२ मा नेपाल र अमेरिकाबीचको खेल पनि टाई भएको थियो । तर त्यो समय नेपालले अंक बाँडेको थियो ।