एजेन्सी – आइसिसी विश्वकप २०२३ मा भारतसँग ५५ रनमा अल आउट हुँदै लज्जास्पद हार व्यहोरेपछि सरकारले श्रीलंका क्रिकेट बोर्डलाई निलम्बन गरेको छ । श्रीलंका खेलकुद मन्त्री रोशन रणसिंघेले बोर्ड समितिलाई निलम्बन गर्दै अन्तरिम समिति गठन गरेका हुन् ।

उनले शाम्मी सिल्भा अध्यक्ष रहेको बोर्डलाई निलम्बन गरेका हुन् । उनको कार्यकाल २०२५ सम्म रहेको थियो । सिल्भाको समितिलाई निलम्बन गर्दै ७ सदस्य नयाँ अन्तरिम समिति समेत गठन गरेका छन् ।

गत विहीबार जितको लागि ३ सय ५८ रनको विशाल विजयी लक्ष्य पछ्याएको श्रीलंका भारतसँग ५५ रनमा अल आउट भएको थियो । उक्त हारपछि श्रीलंका क्रिकेट बोर्डको अफिस अगाडि समर्थकले नाराबाजी गरेका थिए । मंगलबार खेलकुद मन्त्रीले उक्त श्रीलंका क्रिकेट बोर्डलाई निलम्बन गरेका हुन् ।

श्रीलंकालाई सन् १९९६ मा उपाधि जिताउदाका कप्तान अर्जुना रातुङ्गालाई अन्तरिम समितिको अध्यक्षको जिम्मेवारी दिएका छन् । खेलकुद मन्त्री रोशनले सन् १९७३ मा खेलकुद कानुन २५ अनुसार उक्त समिति गठन गरेको श्रीलंकाका सञ्चार माध्यमले जनाएका छन् ।

अन्तरिम अध्यक्षको जिम्मेवारी पाएपछि अर्जुनाले आफ्नो काम दर्शकले माया गर्ने क्रिकेट बनाउने बताएका छन् । ‘मेरो उद्देश्य भनेको देश र दर्शकलाई माया गर्ने खेलाडीहरूले मन पराउने क्रिकेट खेल बनाउनु हो’, अर्जुनाले भनेका छन् ।

सरकारले सिंधै हस्तक्षेप गरेको हुँदा श्रीलंका क्रिकेट बोर्डलाई अन्तर्राष्ट्रिय क्रिकेट परिषद् (आइसिसी) ले निलम्बन गर्ने सम्भावना बढेको छ । आइसिसीले क्रिकेटलाई राजनीतिबाट टाढा राख्न कडा कदम चाल्दै आएको छ । सरकारकै हस्तक्षेपको कारण २०१५ मा नेपाल क्रिकेट संघ पनि आइसिसीको निलम्बनमा परेको थियो ।

जारी विश्वकपमा श्रीलंका टोलीको प्रदर्शन भने राम्रो हुन सकेको छैन । चोटका कारण प्रमुख बलर वानिन्दु हसरंगा र कप्तान दाशुन शानका लगायत केहि खेलाडी टोलीमा समेत छैनन् । श्रीलंका ७ खेलमा २ मा जित र ५ मा हारसहित ४ अंकका साथ छैटौं स्थानमा छ । श्रीलंकाले आज बंगलादेशसँग प्रतिस्पर्धा गरि राखेको छ ।