काठमाडौं (हाम्रो खेलकुद) – नेपाली महिला क्रिकेट टोलीकी प्रमुख तीव्र गतिकी बलर कविता कुँवर तीन महिना मैदान बाहिर हुने भएकी छिन् । एपेन्डिक्सको शल्यक्रियाको कारण तीन महिना मैदान बाहिर रहने कविताले हाम्रो खेलकुदलाई जानकारी दिएकी छिन् ।

कविताले एपेन्डिक्सको कारण गत पाँच गते गृहजिल्ला धनगढीमा रहेको माया मेट्रो अस्पतालमा शल्यक्रिया गरेकी थिइन् । ‘मेरो गत पाँच गर्ते माया मेट्रो अस्पतालमा शल्यक्रिया भएको हो । चिकित्सको सल्लाह अनुसार तीन महिना विश्राम गर्नुपर्छ । अहिले हल्का दुखाई छ’, कविताले हाम्रो खेलकुदसँग भनिन् ।

कविता नेपालकी प्रमुख बलर हुन् । नेपालले अर्को सातादेखी हङकङमा चार देश सम्मिलित महिला टि२० आई सिरिज खेल्दैछ । उक्त सिरिजमा नेपाल, हङकङ, मलेसिया र युएई हुनेछन् । त्यसैको कारण उनी टोलीमा छैनिन् ।

कविता तीव्र गतिसँगै राम्रो ब्याटिङको क्षमता राख्छिन् । उनले ओपनिङ देखी तल्लोक्रम कुनैपनि स्थानमा ब्याटिङ गर्ने गर्दछिन् । बलिङमा उनको गतिको सामना गर्न विपक्षीलाई कठिन पर्दै आएको छ ।

२० वर्षीय कविताले नेपालबाट ४२ टि२० आई खेलमा ३७ विकेट लिनुको साथै १ सय ५३ रन बनाएकी छिन् । उनी नहुँदा नेपाली टोलीमा बलिङ आक्रामण मात्रै होईन टोली सन्तुलनमै ठूलो असर पर्ने देखिन्छ ।

कविताको पूरा क्रिकेट जीवनी यहाँ पढ्नुहोस् : उद्वेग कविताको विश्वकप र विदेशी लिग खेल्ने सपना