अर्जुन कार्की, बागलुङ

नवलपुर बागलुङमा जारी प्रदेशस्तरीय ‘बागलुङ कप’ टि २० क्रिकेट प्रतियोगिताको सेमिफाइनलमा पुगेको छ । अर्को खेलमा कास्की विजयी भएको छ । बाङ्गेचौर खेल मैदानमा नवलपुरले तनहुँलाई ५५ रनले हराउँदै अन्तिम चारको यात्रा तय गरेको हो ।

बुधबारको दोस्रो खेलमा तनहुँलाई ५५ रनले हराउँदै नवलपुरले सेमिफाइनलमा पुग्न सफल भएको हो । समूह चरणको दोस्रो खेलमा २ सय १२ रनको लक्ष्य पछ्याएको तनहुँ १७.५ ओभरमा १ सय ५६ रनमा अलआउट भएको थियो ।

तनहुँ दिनेश बुढा मगरले ४५ बलमा ९७ रन बनाएका थिए । उनले १० चौका र ८ चक्का प्रहार गरे । आनन्द सुनारले १२ र चन्द्रकान्त पौडेलले १० रन थपे । नवलपुरका कप्तान कमल परियारले ४ ओभरमा १६ रन खर्चेर ४ विकेट लिए । सुदिप अर्यालले २ र सागर डोटेलले १ विकेट लिए ।

त्यसअघि टस जितेर पहिले ब्याटिङ गरेको नवलपुरले रविन शर्मा र सुदिप अर्यालको अर्धशतकको मद्दतमा २ सय ११ रनको विशाल योगफल बनाएको थियो । रविनले ५९ रन र सुदिपले ५२ रनको इनिङ खेलेका थिए । टोलीका लागि प्रनिश अर्यालले १७ बलमा २५ रन बनाए ।

तनहुँका सन्दिप पराजुलीले ४ ओभरमा ३६ रन खर्चेर ३ विकेट लिए । दिनेश बुढा मगरले २ र चन्द्रकान्त पौडेलले १ विकेट लिए । हारसँगै तनहुँ प्रतियोगिताबाट बाहिरिएको छ । तनहुँ मंगलबार स्याङ्जासँग पराजित भएको थियो । नवलपुरको जितले स्याङ्जा पनि सेमिफाइनलमा पुगेको छ ।

त्यसअघि दिनको पहिलो खेलमा कास्कीले पर्वत ४ विकेटले हरायो । जितको लागि १ सय १ रनको लक्ष्य पछ्याएको कास्कीले १६.३ ओभरमा ६ विकेट गुमाउँदै पूरा गर्यो । कास्कीको जितमा कप्तान विपिन खत्रीले २२ बलमा २५ रनमा नटआउट रहे । नेपाली यू १९ राष्ट्रिय क्रिकेट टोलीका सुवास भण्डारी १३ रनमा नटआउट रहे ।

पर्वतको लागि विनोद नेपालीले ४ ओभरमा १४ रन खर्चेर २ विकेट र कप्तान अमृत्त गुरुङले ४ ओभरमा १५ रन खर्चेर २ विकेट लिए । टस जितेर पहिला ब्याटिङ रोजेको पर्वतले निर्धारित २० ओभरमा ९ विकेट गुमाउँदै १ सय रन बनाएको थियो ।

पर्वतको लागि कप्तान अमृत्तले ४३ बलमा नटआउट ५८ रन बनाए । अमृत्त प्रतियोगितामा अर्धशतक पूरा गर्ने पहिलो खेलाडी बने । खेलको म्यान अफ दि म्याच कास्कीका सुवास ले ४ ओभरमा २३ रन खर्चेर ३ विकेट लिए ।

प्रतियोगितामा बिहिबार पहिलो खेलमा समूह ए का कास्की र आयोजक बागलुङ तथा दोस्रो खेल समूह बिका नवलपुर र स्याङ्जाबीच प्रतिस्पर्धा हुने आयोजक बागलुङ जिल्ला क्रिकेट संघका सदस्य एवं मिडियाा फोकलपर्सन अभिषेक कटुवालले जानकारी दिए ।