एजेन्सी – आयोजक भारत र अष्ट्रेलिया आइसिसी विश्व कप क्रिकेट उपाधिका लागि आइतबार भिड्दैछन् । यसपटक भारतको फाइनल सम्मको यात्रा अष्ट्रेलियाको तुलनामा निकै सहज रहेको थियो । अष्ट्रेलियाले भने लिग राउन्डदेखि नै संघर्ष गर्दै अघि बढेको हो ।

भारत शीर्षस्थानमा रहँदै सेमिफाइनल पुग्दा अष्ट्रेलिया भने तेस्रो स्थानमा रहेर अघि बढेको थियो । सेमिफाइनलमा भारतले न्यूजिल्यान्डलाई सहजै हराउँदा अष्ट्रेलियाले दक्षिण अफ्रिकामाथि जित निकाल्न संघर्ष गर्नुपरेको थियो ।

विश्व कप क्रिकेटमा अष्ट्रेलिया सर्वाधिक सफल टोली हो । यसअघिका १२ संस्करण आयोजना हुँदा अष्ट्रेलियाले ५ पटक जितेको छ । भारत र वेष्ट इन्डिजले समान २ तथा पाकिस्तान, श्रीलंका र इग्ल्यान्डले समान १ पटक जितेका छन् ।

आइतबारको फाइनल भारतको चौथो र अष्ट्रेलियाको आठौं हो । पछिल्लो पटक यि दुई टोलीबीच सन् २००३ को फाइनल खेल भएको थियो । त्यसपछि का विश्व कपमा भारत २०११ र अष्ट्रेलिया २०१५ को विजेता टोली हो ।

भारत र अष्ट्रेलियाबीच आइतबार अहदाबादमा नरेन्द्र मोदी रंगशालामा हुने फाइनल हुनुअघि दुई दशकको फाइनललाई स्वभाविक रुपमा स्मरण गरिन्छ । त्यति बेला भारत सौरभ गांगुली र अष्ट्रेलिया रिकी पोन्टिङको कप्तानीमा उत्रेको थियो ।

फाइनलमा पहिले ब्याटिङ गरेको अष्ट्रेलियाले पोटिङको एक सय ४० रनको मद्दतमा ३ सय ५९ रन बनाएको थियो । त्यो खेलमा जवाफी ब्याटिङमा उत्रेको भारतले पहिलो ओभरमै सचिन तेक्दुल्करलाई गुमाएको थियो ।

वीरेन्द्र सेहवागले ८१ र अहिलेका प्रशिक्षक राहुल द्रभिडले ४७ रन बनाएपनि भारतले १ सय २५ रनको हार बेहोरेको थियो । दुई दशकपछि यि दुई टोलीबीचको खेल रोमाञ्चक हुने विश्वास गरिएको छ । यसपटकको लिगमा भारतले अष्ट्रेलियालाई ६ विकेटले हराएको थियो ।