काठमाडौं (हाम्रो खेलकुद) – नेपाल पछिल्लो एक वर्षमा अन्तर्राष्ट्रिय क्रिकेटमा निकै ब्यस्त रह्यो । आइसिसी विश्वकप लिग २, एसिसी प्रिमियर कप, आइसिसी विश्वकप छनोट, आइसिसी टि२० विश्वकप एसिया क्षेत्र छनोट र सिरिजहरुले नेपाली टोलीलाई निकै ब्यस्त बनाएको थियो ।

नेपालले पछिल्लो पटक आइसिसी टि२० विश्वकप एसिया छनोटको फाइनलमा नोभेम्बर २ मा टियु क्रिकेट मैदानमा ओमानसँग खेलेको थियो । उक्त टि२० विश्वकप छनोटपछि नेपालको अन्तर्राष्ट्रिय खेलहरु खेलेको छैन । तत्काल हुनेपनि छैनन् ।

नेपालले डिसेम्बरमा पनि अन्तर्राष्ट्रिय खेलहरु खेल्ने छैन । नेपालले अव २०२४ लागेपछि मात्रै खेल्ने तालिका छ । नेपालले अव सिरिजसँगै आइसिसी विश्वकप, टि२० विश्वकप तयारी र टि२० विश्वकप खेल्नेछ ।

अव जनवरीमा सिरिजको सम्भावना

नेपालले अव जनवरीमा सिरिज खेल्ने सम्भावना छ । नेपाल क्रिकेट संघ (क्यान) का सचिव पारस खड्काका अनुसार जनवरीमा सिरिज खेल्ने सम्भावना छ । तर कुन टोलीसँग खेल्ने पक्का भने भएको छैन । सबै टोलीको तालिका मिलेपछि मात्रै पक्का हुने पारस बताउँछन् ।

नेपालले सिरिजको लागि केहि टोलीसँग छलफल गरेकोको बुझिएको छ । जसमा टेस्ट टोली जिम्बावेको पनि चर्चाछ । नेपालले अव खेल्ने पहिलो अन्तर्राष्ट्रिय खेल पनि २०२४ को जनवरीमा हुनेछ । नेपालले कम्तिमा एक टोलीसँग सिरिज खेल्ने पक्का रहेको क्यानले जनाएको छ ।

आइसिसी लिग-२ फेब्रुअरीमा

नेपालले फेब्रुअरी दोस्रो साता आइसिसीको लिग २ खेल घरेलु मैदानमा खेल्नेछ । फेब्रुअरीमा लिग २ को खेल हुने भएपनि कुन कुन टोलीसँग खेल्ने पक्का हुन बाँकी रहेको पारसले बताएका छन् ।

फेब्रुअरी दोस्रो साता नेपाल, नेदरल्यान्ड्स र नामिबियाले खेल्ने चर्चाछ । तर आइसिसीले २०२४ देखी २०२७ सम्म हुने लिग–२ को रोडम्याप सार्वजनिक गरेको छैन ।

यस पटक देखी नेदरल्यान्ड्सले पनि लिग २ नै खेल्नेछ । लिग–२ मा नेपाल, युएई, ओमान, स्कटल्यान्ड, नेदरल्यान्ड्स, नामिबिया, अमेरिका र क्यानडा छन् । लिग २ मा नेदरल्यान्ड्स नेपाल आउने सम्भावना छ । नेदरल्यान्ड्ससँग लिग २ का खेलपछि नेपालले टि२० आई सिरिज खेल्ने तयारी पनि गरेको छ ।

जनवरीमा प्रधानमन्त्री कप

नेपालको प्रमुख घरेलु प्रतियोगिता प्रधानमन्त्री कप आगामी जनवरीमा हुने पारसले जनाएका छन् । प्रधानमन्त्री कपमा ७ प्रदेश र ३ विभागीय टोलीहरुबीच सिंगल राउन्ड रोविनको आधारमा प्रतिस्पर्धा हुनेछ । पहिलो पटक सिंगल राउन्ड रोविनको आधारमा हुनेछ ।

जुनमा टि२० विश्वकप

टि२० विश्वकप आगमी जुन ४ देखी ३० सम्म अमेरिका र वेस्टइन्डिजमा हुनेछ । नेपालसहित कुल २० टोलीले उक्त विश्वकप खेल्नेछन् । २० टोलीलाई चार समूहमा विभाजन गर्नेछ । विश्वकपअघि नेपालले टि२० आई सिरिज र वार्मअपहरु खेल्नेछ । तर कुन टोली, कहाँ र कहिँले खेल्ने पक्का भने भएको छैन ।