काठमाडौं (हाम्रो खेलकुद) – कर्णाली प्रदेश प्रधानमन्त्री कप महिला टि२० राष्ट्रिय प्रतियोगितामा मधेश प्रदेशसँग २१ रनमा अल आउट भएको छ । मधेश ७८ रनको जितका साथ प्रतियोगितामा पाँचौं स्थानमा अन्त्य गरेको छ ।

जितको लागि १ सय रनको मध्यम विजयी लक्ष्य पछ्याएको कर्णाली ९.४ ओभरमा २१ रनमा अल आउट भयो । कर्णालीको लागि बिना थापाले १८ बलमा १ चौकासहित सर्वाधिक १२ रन बनाइन् । कर्णालीका ९ खेलाडी शून्यमा आउट भए । किरण कुँवर १४ बलमा १ चौकासहित ६ रनमा आउट भइन् ।

किरण र बिना बाहेक अन्य कुनैपनि कर्णालीका खेलाडीले खाता खोल्न सकेनन् । मधेशकी पुजा महतोले ४ ओभरमा ९ रन खर्चेर ४ विकेट लिइन् । सरस्वती कुमारी चौधरीले ४ ओभरमा ९ रन खर्चेर ३ विकेट लिइन् । आरती महतोले दुई र कविता गौतमले एक विकेट लिइन् ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको मधेशले निर्धारित २० ओभरमा ७ विकेट गमाउँदै ९९ रन बनाएको थियो । मधेशकी पुजा महतोले ५० बलमा ६ चौकासहित सर्वाधिक ४९ रन बनाइन् । सरस्वती कुमारी चौधरीले ४१ बलमा १ चौकासहित १८ रन बनाइन् ।

कर्णालीको तृर्सना विश्वकर्माले ४ ओभरमा १ मेडनसहित १५ रन खर्चेर २ विकेट लिइन् । अन्जु गुरुङ र विना थापाले १–१ विकेट लिइन् । कर्णाली ७ खेलमा जित विहीन हुँदै बाहिरियो ।

मधेश ७ खेलमा ३ मा जित र ४ मा हारसहित पााँचौं स्थानमा रहेर बाहिरियो । पहिलो क्वालिफायरमा आइतबार कोशी र एपिएफ भिड्नेछन् । एलिमिनेटरमा सुदूर र बागमतीबीच आइतबार खेल हुनेछ । दुबै खेल टियुमा हुनेछन् । पहिलो क्वालिफायरमा पराजित हुने टोलीले फाइनलमा पुग्न एलिमिनेटरको विजेतासँग खेल्नेछ ।