एजेन्सी – भारत र दक्षिण अफ्रिकाबीचको दोस्रो टेस्ट खेलमा पहिलो दिन नै कुल २३ विकेट गुमेको छ । बलर हाबी बनेको खेलमा पहिलो दिनको समाप्तिमा दक्षिण अफ्रिका दोस्रो इनिङमा ६२–३ को अवस्थामा छ ।

दक्षिण अफ्रिका अझै पनि ३६ रनले पछि छ । भारतले पहिलो इनिङमा ९८ रनको अग्रता लिएको थियो । दक्षिण अफ्रिकाका एडेन माक्ररम ५१ बलमा ६ चौकासहित सर्वाधिक ३६ रनमा अविजित छन् ।

उनलाई डेविड वेडिंघमले ७ रनमा साथ दिनेछन् । आफ्नोे टेस्ट करिअरको अन्तिम इनिङमा कप्तान डिएन एल्गर १२, युवा ब्याटर टोनी डी जोर्जी र ट्रिस्टन स्टबस १-१ रनमा आउट भए । भारतका मुकेश कुमारले दुई र जस्प्रित बुमराहले १ विकेट लिए ।

त्यसअघि भारत पहिलो इनिङमा ३४.५ ओभरमा १ सय ५३ रनमा अल आउट भएको थियो । भारत एक समय ३३ ओभरमा १५३-४ को अवस्थामा रहेपनि त्यसपछि बाँकी ११ बलमा कुनै रन नजोड्दै ६ विकेट गुमाएको थियो ।

भारतका लागि विराट कोहलीले ५९ बलमा ६ चौका र १ छक्कासहित सर्वाधिक ४६ रन बनाए । शुभमन गिल ३६ रोहित शर्मा ३९ रनमा आउट भए । श्रेयस ऐर, रविन्द्र जडेजा, जस्प्रित बुमराह, मोहम्मद शिराज र प्रसिद्ध कृष्णाले खाता खोल्न सकेनन् ।

भारतका ७ खेलाडी शून्यमा आउट भए । दक्षिण अफ्रिकाका कागिसो रबाडा, लुन्गी एनगिडी र नान्द्रे बर्गरले समान तीन विकेट लिए ।

त्यसअघि केप टाउनमा टस जितेर पहिला ब्याटिङ रोजेको दक्षिण अफ्रिका २३.२ ओभरमा ५५ रनमा अल आउट भएको थियो । दक्षिण अफ्रिकाका कायल भेरेयानले सर्वाधिक १५ रन बनाए । डेविड बेडिंघमले १२, टोनी डी जोर्जी २ र डिएन एल्गर ४ रनमा आउट भए ।

भारतको सानदार बलिङ सामु दक्षिण अफ्रिकाका ९ खेलाडीले दोहोरो अंकमा रन बनाउन सकेनन् । भारतका मोहम्मद शिराजले ९ ओभरमा ३ मेडनसहित १५ रन खर्चेर ६ विकेट लिए । जस्प्रित बुमराह र मुकेश कुमारले २-२ विकेट लिएका थिए ।

दुई खेलको सिरिजमा दक्षिण अफ्रिका १-० ले अघि छ । पहिलो खेलमा दक्षिण अफ्रिका ३२ रनको इनिङ अन्तरले विजयी भएको थियो ।